P1.2M marijuana gilarot

CEBU, Philippines — Gipanglarot sa mga sakop sa PNP Drug Enforcement Group-Special Operation Unit-7, Philippine Drug Enforcement Agency ug Intelligence Support Units ang kaliboang punoan sa marijuana diha sa hilit nga bahin sa Sitio Maraag, Barangay Sudlon II, Dakbayan sa Sugbo niadtong Miyerkules sa buntag, Abril 9, 2025.

Giibot ug gisunog dayun sa kapulisan ang kapin 6,000 ka punoan sa marijuana ug 500 ka semilya niini nga mobalor tanan og P1.2 million. Gitanom kini sa 6,000 square meters kalapad nga bakilid nga lugar.

Ang maong operasyon resulta kini sa impormasyon nga nadawat sa otoridad nga dunay marijuana nga gitanom sa naasoy nga dapit.

Padayon pa nga gisuta sa kapulisan kinsay nagtanom sa maong mga marijuana. Ang mga marijuana gidauban diha mismo sa lugar ug nagkuha lang mga pipila ka punoan isip ebidensiya. (BANAT NEWS)