Kapin sa 3,000 ka mag-uuma nakadawat og agri-inputs

CEBU, Philippines — Kapin sa 3,000 ka mag-uuma sa humay gikan sa Lungsod sa Bilar, Probinsiya sa Bohol ang nakadawat og agricultural inputs gikan sa Department of Agriculture Central Visayas (DA)-7 aron suportahan ang produksiyon sa humay sa probinsiya.

Sa kinatibuk-an adunay 3,817 ka mag-uuma ang nakadawat sa maong gamit sa panguma nga nagkantidad og P4,576,489.50.

Gipundohan ubos sa DA-Rice Program ang agri-inputs diin ang gipang-apod-apod ngadto sa mga mag-uuma mao ang inorganic fertilizer, bio-fertilizers, ug soil ameliorants (fermented chicken dung) pinaagi sa discount voucher.

Ang DA-7 nagkanayon nga ang kombinasyon niining mga abono nagsiguro sa pagtubo sa tanom pagpalambo sa kahimsog sa yuta, pagpausbaw sa nutrient availability, ug pagpadaghan sa ani.

Human madawat ang ilang vouchers gikan sa mga personnel sa DA-7, ang mga mag-uuma niduol ngadto sa kaubang mga negosyante nga anaa sa venue atol sa pag-apod-apod aron sa pag-claim sa ilang agri-inputs.

Matud sa ahensiya nga ang roll-out sa discount voucher usa ka alokasyon alang sa dry season cropping sa tuig 2024-2025 aron matabangan ang mga mag-uuma sa humay nga makaminos sa gasto sa produksiyon samtang nagtinguha sa doble nga tumong sa DA ang pagpadaghan sa ani ug pagpataas sa kita.

Gawas sa agri-inputs, ang DA nag roll-out usab sa fuel subsidy discount (FDV) nga magpadayon karong semanaha sa mga lungsod sa Bilar, Batuan ug Talibonl. BDB BANAT NEWS