Duha ka lalake sikop sa managlahing buy-bust operation

CEBU, Philippines — Duha ka mga lalake nga nalambigit sa illegal nga drugas ang nadakpan sa managlahi nga buy-bust operation sa Parian Police Station 1 ug Talamban Police Station 8 Cebu City Police Office niadtong Martes, Marso 25, 2025.

Unang nadakpan sa mga operatiba sa Talamban Police Station 8 ang usa ka Street Level Individual atol sa ilang buy-bust operation sa sitio Nasipit, Barangay Talamban, siyudad sa Sugbo.

Ang nadakpan mao si Julito Mendaros Adolfo alyas Tingrol, 59 anyos, minyo, wala'y trabaho ug nagpuyo sa naasoy nga dapit.

Nakuhaan ang suspetsado og 6 grams nga shabu nga nagkantidad og P40,800.

Ang mga ebidensiya nga gikuha gisumetir na sa Cebu City Forensic Unit alang sa examination.

Samtang nadakpan sab sa kapolisan sa Parian Police Station 1 ang laing street level individual sa ilang buy-bust operation sa sitio Samayo, Barangay Lorega San Miguel ning siyudad.

Ang suspetsado mao si Johnrey Baylosis Abregonda alyas Janrey, 30 anyos ug residente sa M.J Cuenco Avenue, Barangay Carreta, Cebu City.

Nasakmitan ang suspect og 5 grams nga shabu nga nibalor og P34,000.

Kasong kalapasan sa Republic Act 9165 ang ipasaka batok sa duha ka suspetsado. (BANAT NEWS)