Garcia: Purchase order sa bugas nga gipakita sa konseho sayop

CEBU, Philippines — Gibutyag ni Cebu City Mayor Raymond Alvin Garcia nga sayop ang purchase order nga gipakita sa konseho kabahin sa bugas nga gipang-apod-apod diha sa Barangay Duljo Fatima. Gikwestiyon sa konseho ang maong kontrobersiyal nga pagpang-apod-apod sa bugas nga nahitabo niadtong Marso 11, 2025 nga gikatahong nakadawat og hinabang ang barangay gikan sa kagamhanan sa Dakbayan sa Sugbo bisan og wala kini gipaubos og state of calamity. Sa usa ka post diha sa Facebook gipakita ni Konsehal Jocelyn Pesquera ang pundo nga 166,600 ka sako nga bugas gikan sa A1 Milling Corporation nga nagkantidad ngadto sa P49,896,700 nga ubos sa account sa Local Disaster Risk Reduction and Management Relief and Recovery.

Apan sa pagpakighinabi ngadto kang Garcia giklaro niya nga ang pundo sa maong bugas gikan sa Department of Social Welfare Services.

“Gihatag man na sa social service sa mga tawo… Sayop ang purchase order nga ilang gipakita”, matud ni Garcia.

Matud ni Garcia nga ang 166,600 ka sako nga bugas nahatag na kini niadtong niaging tuig pa ug hagbay na kadtong nahurot ang pundo alang sa pagpang-apod-apod sa bugas. Gihatagan usab og katin-awan ni Garcia ang maong isyu tungod kay gipasanginlan siya siya sa iyang mga kaatbang sa politika nga namolitika pinaagi sa paggamit sa pundo sa kagamhanan. — /BDB (BANAT NEWS)