Vlogger gidakop sa NBI

CEBU, Philippines — Usa ka vlogger nga taga Cebu ang gidakop sa mga sakop sa National Bureau of Investigation tungod sa pagpakatap niini og fake news pinaagi sa pag-edit sa unod sa statement ni Presidente Ferdinand "Bongbong" Marcos Jr. nga nigawas sa usa lehitimong media outlet aron ipagawas nga ang presidente nagtinguhang himuong legal ang ilegal drugs.

Matud pa sa report gikan sa NBI, ang suspek mao si Wendelyn Magalso nga taga Oslob, Cebu.

Niadtong Marso 19,2025 nakadawat ang NBI og advisory gikan sa TV5 News Network Inc. nga nagpahibalo nga ang ilang gi-post nga balita dunay mi-usab ug nigawas na hinuon nga fake news nga gituyo gyud aron dauton si Presidente Ferdinand Marcos Jr.

Ang orihinal nga post sa News5 sa Facebook Page nikutlo sa pamahayag ni Marcos nga nag-ingon: “Sa laban kontra droga at krimen, hindi natin kailangan dumaan sa madugong solusyon. Walang naniniwala na ang solusyon sa krimen at droga ay pumatay ng libu-libong kapwa Pilipino. Hindi tama ‘yun. Ang tamang paraan para tiyakin ang kapayapaan at kaayusan ay sa pamamagitan ng maayos na batas.”—Pres.Bongbong Marcos Jr., March 14,2025.

Apan ang gi-post ug gipakatap ni Magalso, giusab niini ang unod sa pamahayag sa presidente aron ipagawas nga kini nag-ingon: “Sa laban kontra droga at krimen, hindi natin kailangan dumaan sa madugong solusyon. Walang naniniwala na ang solusyon sa krimen at droga ay pumatay ng libu-libong kapwa Pilipino. Hindi tama ‘yun. Ang tamang paraan para tiyakin ang kapayapaan at kaayusan ay sa pamamagitan ng maayos na batas. Gumawa tayo ng batas na gawing “Legal” ang droga sa ating bansa.”—Pres.Bongbong Marcos Jr., March 14,2025.

Gipun-an kini sa suspek og “Gumawa tayo ng batas na gawing “Legal” ang droga sa ating bansa.” Hinungdan nga nahimo kining fake news.

Niana sab adlawa, ang reporter sa TV5 Cebu nga si John Aroa midangop sa NBI-CEVRO ug nipahibalo nga ang iyang balita bahin kang Marcos gi-edit og nikatap sa social media.

Sa pagsubay sa NBI, na-trace nila ang vlogger nga mao si Magalso nga dunay gibutang nga caption nga: LEGAL NA DAW ANG DROGA (angry emoticon) GRABE NAMAN KA MARCOS NGAYON HARAPIN MO ANG LAHAT NG HAMON KUNG MAKAKABALIK KAPA PAGKALUUYA SA MGA INOSENTE.

Natultolan sa NBI si Magalso sa iyang pinuy-anan sa Sitio Bombil, Barangay Lagunde sa lungsod sa Oslob, Cebu. Siya nangangkon nga tulo ka tuig na siyang vlogger.

Gidakop siya tungod sa paglapas sa Art.154 sa Revised Penal Code (Illegal Use of Publication) in relation to Sec.6 sa Republic Act No.10175 o Cybercrime Prevention Act of 2012.

Kun makombikto mabilanggo siya og unom ka buwan ug us aka adlaw hangtud unom ka tuig o multa nga P40,000 ngadto sa P200,000.

Sa report sa GMA News.tv, si NBI Director Jaime Santiago miingon nga nikooperar na kanila karon ang nagkadaiyang social media platforms aron pakgangon kining nagsige og pakatap og fake news.

“Unti-Unti na kami, kumukuha kami. Nakikipag cooperate sa amin ang Facebook, nakikipag cooperate ang TikTok, ito na po. Kaya warning sa kanila: hindi namin sila tatantanan,” matud pang Santiago.

Niangkon si Magalso nga nakakwarta siya pinaagi sa iyang pag vlog. Human sa iyang pagkasikop, naghilak kini ug nangayo og pasaylo kang Marcos ug misaad nga dili na siya mousab.

“‘Yun namang mga gumagawa, ‘yung iba ay katuwaan lamang. Hindi katuwaan ito. May kaakibat na krimen ito na makakasuhan kayo. At pag nakasuhan kayo katulad nito… ngayon umiiyak. Hindi na daw niya uulitin,” dugang pang Santiago. IBM BANAT NEWS