Kawatan nangurus pa human nangawat

CEBU, Philippines — Gisakiyo sa wala pa mailhing kawatan ang tanang  microphones nga gamiton sa mga choir sa San Lorenzo Ruiz Parish, Barangay Tisa ning Dakbayan sa Sugbo, niadtong adlaw nga Miyerkules, Marso 13, 2025 nga nakita sa CCTV camera sa simbahan.

Nakuha sa CCTV nga sayo sa buntag adlaw nga Miyerkules nakita ang maong lalaki nga nagsaoy-saoy sa palibot sa simbahan ug dayon misulod kini sa simbahan pagkahuman sa Santos nga Misa.

Mingaw na ang palibot ug nakita nga gitangtang niini ang iyang kalo nga gisul-ob.

Nisaka kini sa choir loop ug didto mura og gipanghipos niini ang mga mikropono sa mga mic stand ug gisuksik sa iyang likod.

Nipatighulog kini sa altar ug nisuling-suling sa pagtuo nga aduna pa kini mabitbit. Sa dihang nasuta sa lalaki nga wala na siyay masakiyo, niatubang kini sa imahen ni San Pedro Calungsod ug dayon nanguros ug nigawas sa simbahan.

Sa dihang nakagawas na ang kawatan gibalik niini og suot ang iyang kalo ug nilakaw.

Matud pa ni Hipolito "Lito" Papillero, usa ka tigduyog ug maoy nag upload sa video nitug-an nga niadtong Lunes sa hapon unang nasayran sa dihang padulong na ang Santos nga Misa nawala ang duha ka microphone, apan wa kini makita sa CCTV.

Apan Miyerkules sa hapon sa dihang padulong na usab sa Santos nga Misa didto na batyagan nga nawala na usab ang laing duha ka mga mic nga nahabilin.

Ilang gibalik og susi ang CCTV ug ning tungora nakuha na ang gibuhat sa maong lalaki.

Gipadayag ni Papillero, abli ra ang simbahan panahon sa adlawan aron makasulod ra ang mga tawo nga buot mag-ampo ug didto nakahigayon ang suspetsado nga makakuha sa dihang nagmingaw ang palibot.

Ang maong insidente wala mataho sa kapolisan tungod sa ilang pagtuo nga makonsensya lang ang nagkuha niini.

Si Papillero, niawhag sa mga nakapalit sa maong mga microphone nga kung mahimo mauli nila sa simbahan kay gamitonon kaayo alang sa mga kantura sa simbahan.

Gitug-an ni Papillero, kung nabaligya na sa suspetsado ang microphone maayo unta gamiton niini sa tinarong ug panginahanglanon ang kwarta ug dili sa bisan asa lang.

Apan kung gusto niini nga iuli mahimo ra kining moadto sa simbahan kay andam man sila motabang sa iyang panginahanglanon kung anaa. (BANAT NEWS)