Pagtrabaho sa dalan Pit-os nalangan bisan aduna nay budget

CEBU, Philippines — Gibutyag ni Konsehal Nestor Archival ang mga hinungdan sa pagkalangay sa pagtrabaho sa road widening sa dalan Pit-os sa Barangay Talamban, Dakbayan sa Sugbo.

Matud ni Archival nga aduna na gyu’y nakaandam nga budget gikan sa nasudnong kagamhanan.  Nasayran nga adunay mga tag-iya sa luna nga dili mosugot nga ibaligya sa kagamhanan nga hinungdan sa pagkalangan sa trabaho.

Gibutyag ni Archival nga titulo sa luna ra usab maoy bayaran sa gobiyerno.

Si Archival nipadayag sa iyang pagduda nga ang laing rason nga wala kini malihok hangtud karon posible nga ang gipangtahasan sa maong trabaho wala molihok bisan og pila na ka mayor ang nilingkod sa siyudad. “Considering we have the money, we have to push it more”, matud ni Archival aron masulbad na ang problema sa kahuot sa dagan sa trapiko diha sa maong dapit nga giingong molanat og pipila ka oras nga matanggong ang mga pasehero nga namuyo sa maong dapit.

Niadtong niaging semana nisugyot si Konsehal Pastor “Jun” Alcover, Jr. sa konseho nga dili paagian og truck ang maong dalan ilabi na kong rush hour aron mamenosan ang kahuot sa dagan sa trapiko. (BANAT NEWS)