Nurse aide nalatayan sa tanker
CEBU, Philippines — Nakabsan sa kinabuhi ang usa ka 39-anyos nga babaye human kini nalatayan og tanker dihang nasaghiran niini diha sa viaduct sa South Road Properties (SRP), Barangay Mambaling, siyudad sa Sugbo, pasado alas 7 sa gabii niadtong Miyerkules, Marso 19, 2025.
Ang namatay mao si Robeliz Carulasan Oyao, 39, taga Barangay Agus, Dakbayan sa Lapu-Lapu nga usa ka nursing aide sa usa ka pribadong tambalanan.
Samtang angol ang kapuyo niini nga maoy nag drive sa motorsiklo nga si Glenn Dela Rosa Ochea, 45.
Ang drayber sa tanker mao si Damelito Loro Casas, 50, taga Barangay Bongayan, Lungsod sa Borbon.
Ang mga biktima gikan pa nitambong sa kasal sa igsuon sa namatay ug padung na sila pauli.
Matud niini ga-una sila sa tanker nga hinay ang dagan ug nagpapidpid, apan giingong ni-overtake nila ang tanker ug nitipas kini sa wala diin sila nagsubay ug naigo ilang manobela hinungdan sa ilang pagkatumba ug nalabay ang iyang kapuyo padung sa ligid ug nalatayan kini.
Ang drayber sa tanker nangangkon nga wala siya nakakita sa motor.
Gikustodiya sa Traffic Enforcement Unit Cebu City Police Office ang driver sa tanker ug giandam na ang kasong Reckless Imprudence Resulting in Homicide with Physical Injury and Damage to Property nga ipasaka batok niya. (BANAT NEWS)
- Latest
