Motorsiklo ug pickup nagsungag, usa patay

CEBU, Philippines — Usa patay sa dihang nibangga ang usa ka motorsiklo sa usa ka pickup diha national highway, Barangay Poblacion, Lungsod sa San Remigio, Probinsya sa Sugbo pasado alas 11 sa gabii niadtong Domingo, Marso 16, 2025.

Ang nakalas mao ang driver sa motorsiklo nga si alyas Reggie, 35 anyos, nagpuyo sa Barangay Lambusan, Lungsod sa San Remigio.

Angkas sa biktima ang 15 anyos nga babaye nga menor de edad nga taga Barangay Lambusan, San Remigio, Cebu.

Samtang ang pickup gimaneho sa usa ka 44 anyos nga lalake nga si alyas Benjie taga Purok Chico, Barangay Victoria, Lungsod sa San Remigio.

Sa imbestigasyon sa San Remigio Police Station ang pickup gikan sa junction sa usa ka convenience store ug pa-left turn kini paingon sa public market dihang ang motorsiklo nga gikan sa Bogo City ug kusog matod pa ang dagan nibangga sa atubangan nga bahin sa pickup.

Gumikan sa impact nakaangkon og grabeng kadaot sa lawas ang driver sa motorsiklo ug dihang gidala sa tambalanan gideklarar kining dead-on-arrival. (BANAT NEWS)