Garcia wa magtuong mahimong mayor

CEBU, Philippines — “This passion to serve and this drive to serve should really be continued,” pulong pa ni Cebu City Mayor Raymond Alvin Garcia atol sa eksklusibong pagpakighinabi niya sa The Freeman ug atol sa programang #KnowYourCandidate.

Si Garcia milingkod isip mayor sa Dakbayan sa Sugbo sukad pa niadtong Mayo 2024 human gipaubos og suspensyon si kanhi mayor Michael Rama. Sa dihang na-dismiss si Rama niadtong Oktubre sa paghupot og pampublikong buhatan, mihurar si Garcia sa samang buwan.  Si Garcia nagkanayon nga bisan pa man og daghang giatubang ang problema ang syudad, wala gyud nagmakuli nga atubangon ug sulbaron tungod kay alang kaniya, andam gyud siya motabang sa siyudad.

“Ang atoa man gud kay gusto man gud ta nga motabang sa syudad sa Sugbo, bisan sa akong amahan, nakita man nako while growing up—the passion, the desire to serve, and I really think that I also got it from him nga grabe ang iyang pagtabang sa atong mga kaigsuonan,” saysay pa niya.

Si Garcia anak ni kanhi Cebu City Mayor Alvin Garcia nga mihupot sa maong posisyon sa duha ka termino niadtong tuig 1995-2001.

 “Dili sab ko makaingon nga part of the plan to be a mayor nga imo gyud nga gi-look forward ang position—makaserbisyo lang ta in whatever capacity. But in your own private capacity, makatabang man ka pero limited ra man gud imong jurisdiction. Dili man gud pareho if you are really a public official,” padayag pa ni Garcia.

Karon nga nahatagan pg higayon si Garcia nga mahimong mayor sa syudad, gihinay-hinayan niya og tubag ang mga yangungo sa katawhan nga hagbay ra gyud nga gipadayag bisan pa man og siya nilingkod isip konsehal niadtong 2016 hangtud sa nahimo siya nga bise mayor.

Kung mapili siya isip mayor sa syudad, prayoridad niya nga ipahuman na gyud ang Cebu City Medical Center nga usa ka dekada nang gitukod.

Hatagan sab og pagtagad ni Garcia ang problema sa baha sa syudad. Gisaysay ni Garcia nga ang drainage system sa syudad karaan na kaayo ug dili na maka-akomodar sa tubig kun mobunok ang uwan.

Dugang pa ni Garcia og mga mini dam sa bukirang barangay aron nga mapalangay pa ang pagdagayday sa tubig uwan gikan sa bukid.

Ang mga matigom nga tubig sa mga mini dams, mamahimong magamit sa irigasyon ug i-treat sab kini, mahimo kining potable water.

Gitataw ni Garcia nga ang ubang problema giatubang sa syudad sama sa trapiko dili basta-basta nga masulbad apan mapangitaan og solusyon.

“Number one, it cannot be solved overnight. Number two, depende sab na sa inyong executive. Kay kung abtik imong executive, then maresolbar ang problema, or at least mahatagan og plano. Ang importante naa kay vision for the problem that is at hand,” suma pa ni Garcia.

“If the council cannot work with me kay lain ilang interest, dili interest sa kinabag-an, then mas maayo nalang sa umaabot piniliay nga ang mga tawo motan-aw sa mga konsehal nga ilang botaran kanang motabang, kanang moabag ug dili mobabag,” esplikar pa ni Garcia. (BANAT NEWS)