DBM nipagawas og lagda alang sa bag-ong namugna nga NIR

Cebu, Philippines —  Nagpagawas ang Department of Budget and Management (DBM) og mga guidelines o mga lagda alang sa pagtukod og mga opisina, pag-hire og mga personnel, ug alokasyon sa pundo alang sa Negros Island Region (NIR).

Aron masiguro ang hapsay nga operasyon ug serbisyo sa gobyerno sa bag-ong namugna nga rehiyon, giisyu sa DBM ang Circular Letter No. 2025-3, nga nagmando sa pagtukod og regional office sa ubang kagawaran o ahensya. Ang DBM nagkanayon nga subay sa Section 4 sa Republic Act No. 12000, adunay itukod nga mga opisina sa gobyerno sa Negros Occidental nga may kalabotan sa agrikultura, yuta, kalinaw ug kahusay, seguridad, ug pagdumala.

Ang pundo para sa inadlaw nga operasyon ug mga panginahanglanon sa imprastraktura sa mga opisina sa NIR magagikan sa kasamtangan nga mga badyet sa mga hingtungdang departamento sa Rehiyon VI ug VII. Ang mga ahensya mahimo usab nga mogahin og dugang pundo kung gikinahanglan.

Gipahayag usab sa circular ang mga mekanismo sa pagtukod sa organizational structure ug staffing pattern sa mga opisina sa NIR, lakip ang pagbalhin o pagdetalye sa mga kasamtangang kawani, pagtudlo sa mga interim heads ug mga pamaagi sa pagpuno sa nahabilin nga mga posisyon. Bisan pa man, tungod sa umaabot nga 2025 Nasyonal ug Lokal nga Eleksyon, ang tanan staffing actions ug personnel movements motuman sa mga probisyon sa Omnibus Election Code.

Napasar ang balaod niadtong Hunyo 11, 2024, ang NIR Act nagdugtong sa mga probinsya sa Siquijor, Negros Oriental, ug Negros Occidental, aron sa pagpalambo sa desentralisadong administrasyon, pagpalig-on sa lokal nga awtonomiya, ug pagpadali sa ekonomikanhon, kultura, ug katilingbanong kalamboan.