P95.4 milyones giapod apod sa probinsiya sa unom ka LGUs

CEBU, Philippines — Gipang-apod apod sa Kagamhanan sa Probinsya sa Sugbo ang P95.4 milyon nga hinabang pinansyal alang sa unom ka lokal nga kagamhanan (LGU) sa Ika-upat nga Distrito sa Sugbo aron suportahan ang ilang mga proyekto sa pagpalambo sa imprastraktura.

Ang mga tseke, nga nagkantidad og P15 milyon hangtod P16 milyon matag LGU, gipanghatag atol sa Caravan of Government Services sa Municipal Gym sa San Remigio, amihanang Sugbo, niadtong Biyernes, Pebrero 7.

Kini nga kalihokan mao ang ikaduhang yugto sa Caravan alang sa tuig 2025.

Ang mga tseke gidawat sa mga mayor, bise mayor, mga miyembro sa Hunta Probinsya, ug mga kapitan sa barangay nga adunay mga proyekto nga suportahan sa maong hinabang pinansyal.

Ang San Remigio, nga maoy host nga lungsod, nakadawat sa labing dako nga alokasyon nga P16.7 milyon, nga gidawat ni Mayor Alfonso Pestolante ug Bise Mayor Mariano Martinez.

Ang Dakbayan sa Bogo, nga gipangulohan ni Mayor Carlo Jose Martinez ug Bise Mayor Maria Cielo Martinez, nakadawat sa ikaduhang labing dako nga pondo nga P16.4 milyon.

Ang lungsod sa Daanbantayan, nga gipangulohan ni Mayor Sun Shimura ug Bise Mayor Ali

Abucay, nakadawat og parehong kantidad sa lungsod sa Tabogon, nga gipangulohan ni Mayor Francis Edward Salimbangon ug Bise Mayor Eric Alivio, nga pareho nga nakadawat og P15.8milyon.

Dugang pa, ang Medellin, nga gipangulohan ni Mayor Joven Mondigo Jr. ug Bise Mayor Alfonso Lim, nakadawat og P15.5 milyon, samtang ang Tabuelan, nga gipangulohan ni Mayor Raul Gerona ug Bise Mayor Rex Gerona, nakadawat og P15.2 milyon.

Matud sa Sugbo News, ang opisyal nga media arm sa Kapitolyo, ang gidak-on sa kantidad nga gipang-apod nagdepende sa aktibong partisipasyon sa matag LGU sa mga miting ug programa sa Probinsyal nga Kagamhanan, diin gikinahanglan ang presensya sa ilang mga opisyales.

Ang distribusyon gipangulohan ni Gobernador Gwendolyn Garcia isip paningkamot nga patas nga ipang-apod apod ang mga pundo sa Kapitolyo. Ang pundo gamiton aron mapalambo ang imprastraktura, lokal nga serbisyo, ug ubang mahinungdanong panginahanglan sa komunidad, subay sa mga prayoridad nga gitakda sa lokal nga mga opisyales.

Kini nga pundo ubos sa hugot nga mga lagda ug regulasyon sa pag-audit sa Commission on Audit (COA) ug kinahanglan gamiton lamang alang sa gitakdang katuyoan sumala sa mga requests nga gisumiter sa mga opisyales ngadto sa Kapitolyo. (BANAT NEWS)