Nalambos sa skywalk patay

CEBU, Philippines — Patay ang usa ka rider samtang naangol ang laing rider human madisgrasya ang gimaneho nilang motorsiklo sa nagkalain-laing oras ug dapit sa Dakbayan sa Talisay niadtong miaging gabii.

Alas 12 sa tungang gabii, nakalas ang usa ka rider diha sa Sombrea Skywalk sa Barangay Lawaan 1 sa nahisgutang siyudad.

Ang mga nakakita sa panghitabo nihulagway nga kusog nga nagpadagan sa motorsiklo ang biktima hangtud nga nibangga kini sa railings sa hagdanan sa skywalk.

Tungod sa kakusog sa pagbangga nalambos kini sa maong estraktura ug nakaangkon og grabeng kadaut sa kalawasan.

Sa pagresponde sa Emergency Responder sa Talisay patay na ang rider.

Usa ka oras sa wala pa kini nahitabo, dunay nalamba nga motorsiklo diha sa sitio Tigib, Barangay Lagtang.

Matud pa nga samtang nagdagan luwan sa iyang gimaneho nga motorsiklo kalit kini nga nalamba sa pag-agi sa kurbadahon nga dalan.

Nahibaw-an nga nakainum ang rider nga gituohang nag-banking –banking apan nabagnos hinuon sa dalan. Gidali siya og dala sa tambalanan tungod sa naangkong mga pangos.

Ang City of Talisay-Traffic Operation Development Authority (CT-TODA) nipahimangno sa mga drayber nga likayan ang pagmaneho kun nakainom og ilimnong makahubog. (BANAT NEWS)