Cebu City moimplementar sa road recovery project sa Sambag 1

CEBU, Philippines — Human sa pag-aspalto sa mga dalan sugdan na usab sa kagamhanan sa Dakbayan sa Sugbo ang 300-meter stretch nga road recovery project diha sa Sambag 1 diin nikabat ngadto sa P7 milyones ang gigahin niining pundo.

Gibutyag ni Cebu City Councilor Jerry Guardo, chairman sa committee on infrastructure sa konseho sa siyudad nga ang funding sa proyekto maggikan sa Local Development Fund (LDF) nga dunay P800 milyones nga allocation alang sa infrastructure projects.

Matud ni Guardo nga ang dalan adunay 18 metros ang gilapdon base sa natala sa talaan sa City Planning and Development Office sa siyudad samtang ang kasamtangang dalan pito ka metros lang ang gilapdon niini.

Si Guardo nagkanayon nga kinahanglang bawion nila ang nahibiling gilapdon nga wala pa magamit isip pampublikong dalan.

Nasayran nga ang Department of Engineering and Public Works maoy motrabaho sa proyekto ug kutob lang sa maabot sa gigahin nga P7 milyones ang trabahuon.

Si Guardo nagkanayon usab nga subay kini sa direktiba ni Cebu City Mayor Raymond Alvin Garcia sa paghimo og massive land recovery  diin mopahigayon og road widening nga usa sa gilantaw nga makatabang sa pagsulbad sa kahuot sa trapiko diha sa dapit.

Maglakip sa maong proyekto mao ang road concreting, drainage system ug pagtukod sa mga sidewalk ug gutter gikan sa Librando Terminal hangtud sa JDC building sa Barangay Sambag 1 nga gibana-banang adunay 300 metros ang gitas-on.

Ang ceremonial groundbreaking sa proyekto gipahigayon niadtong Lunes, Pebrero 3, 2025. BDB BANAT NEWS