Gullas niduaw sa haya sa inahan ug duha ka anak nga gipatay sa Naga

CEBU, Philippines — Emosyonal nga nibisita si kongresista Rhea Gullas sa haya sa inahan ug duha niini ka mga anak nga gipatay sa ilang kaugalingong padre de pamilya.

Sa nasayran ang linuog nga krimen nahitabo sa miaging semana sa Barangay Lutac, Siyudad sa Naga.

Ang mga biktima mao sila si Junelyn Gimenez, 32 anyos ug duha ka anak niini nga sila si John Carlo, 11 anyos ug ang kinamanghuran nga si LJ, 2 anyos.

Ang suspek mao ang padre de pamilya nga si Carlo nga giingong sabog sa ilegal nga drugas nga nihimo sa krimen.

Matud pa ni Gullas nga gikumot ang iyang kasing-kasing sa dihang nahinabi niya si JC, ang 7 anyos nga nahabilin sa pamilya.

Nagkanayon si Gullas nga makita pa gyud niya ang pagka trauma sa bata ug iyang nabati ang kasakit sa gidangatan niini.

Ang kongresista nipasalig ngadto sa inahan ni Junelyn nga maoy moabaga sa pagpalubong sa mga biktima ug mihatag usab og pinansyal nga ayuda ingon man pagkaon ngadto sa pamilya.

Aduna usab silay gihatag nga financial aid ngadto sa pamilya pinaagi sa DSWD AICS program.

Nagpasalamat si Gullas nga daghan ang nakahatag og tabang sa nahabilin nga pamilya tungod kay dili lalim ang ilang nahiaguman. — /MEL (BANAT NEWS)