POGO posibleng front sab sa pangespiya

CEBU, Philippines — Gisusi sa National Bureau of Investigation (NBI) ang posibilidad nga ang mga Philippine Offshore Gaming Operator (POGO) hubs nga gipasirad-an na sa nasud gigamit sa mga Chinese nationals nga front lamang para sa espionage operations o pagpangespiya dinhi.

Si NBI Director Jaime Santiago sa press conference kagahapon, Pebrero 2, 2025 diha sa NBI-Central Visayas Regional Office (CEVRO), miingon nga bukas sila sa pagsusi niini nga isyu.

Matud pa niya, ilaha na karong gihimay-himay og susi ang posibilidad nga ang POGO hub sa Lapu-Lapu City gigamit sa mga Chinese nationals aron mag-espiya sa mga kalihokan sa militar sa Cebu.

Ang imbestigasyon nagpadayon tungod sa kaduol sa lugar niini sa Naval Forces Central (Navforcen) ug ingon man sa Benito Ebuen Air Base nga dunay EDCA (Enhanced Defense Cooperation Agreement) site sa US Armed Forces.

Wala hinuon mohatag og mga detalye bahin sa imbestigasyon si Santiago apan nakahibalo siya sa mga paningkamot nga gihimo sa NBI-CEVRO nga gipangulohan ni Regional Director Renan Augustus Oliva.

“Meron kaming mga operations. Nag-report na sa aking si RD regarding that matter but confidential muna,” matud ni Santiago.

Gawas pa niini, si Santiago miingon nga ang Intelligence Service of the Armed Forces of the Philippines (ISAFP) nag-request sa ilang tabang human sa pag-report sa nadiskubrehang mga wala mailhi nga floating equipment sa Bohol niadtong miaging buwan.

Sa miaging buwan, dunay gituohang Chinese underwater drone nga nakuha ang mga lokal nga mananagat sa Bohol.

Sumala sa mga report, ang Navy spokesperson sa West Philippine Sea nag-ingon nga labing menos lima ka submersible drones ang nakit-an sa nagkalain-laing parte sa nasud sa miaging tuig.

Gawas sa Bohol, dunay underwater drone nga nakit-an sa dagat sa San Pascual sa Masbate niadtong Disyembre 30 giisip nga gikan sa China, base sa imbestigasyon sa Philippine National Police.

"So nakikipag-ugnayan kami sa kanila and makikita niyo marami na tayong nahuhuli," matud ni Santiago.

Mahitungod sa mga POGO hubs, si Santiago mipasalig nga dili nila biyaan ang mga kaso sa POGO hubs ilabi na nga maoy koneksyon kini sa depensa ug seguridad sa nasud, ilabi na sa Sugbo.

"Hindi natutulog ang ating mga active offices and operatives para manmanan lahat ng bagay na ito para maging safe ang iyong bayan lalo na dito sa Cebu," matud ni Santiago.

Walay gitumbok nga bag-ong POGO hubs dinhi sa Central Visayas si Santiago apan siya mipasalig nga padayon silang nag-monitor niini.

Giklaro usab ni Santiago nga tanang POGOs nga nag-operate sa nasud ilegal na human gi-revoke ilang mga lisensya ni Presidente Ferdinand Marcos Jr. sugod niadtong Disyembre 31, 2024.

Niadtong miaging tuig, ang Regional Office nagpatuman og crackdown sa POGO hubs sa Sugbu nga niresulta sa pagkasakop sa hubs sa Lapu-Lapu City ug Moalboal. — /IBM (BANAT NEWS)