Random drug test sa kapolisan gihimo kada semana
CEBU, Philippines — Gihingusgan karon sa kapolisan sa Lapu-Lapu City Police Office (LCPO) ang matag semana nga random drug test isip pagsanong sa kamandoan sa bag-ong Police Regional Office 7 director.
Suma pa ni Police Lieutenant Colonel Christian Torres, tigpamaba sa Lapu-Lapu City Police Office nga sa unang random drug test nga gipahigayon nag-una ang ilang 20 ka mga personnel nga nadistino sa ilang headquarters sa LCPO.
Dugang pa ni Torres nga ang random drug test gihimo na matag Lunes human sa ilang pagtambong sa flag raising ceremony sukwahi kaniadto nga gihimo kini nga quarterly kun kaupat matag tuig.
Gitataw ni Torres nga kini gihimo aron pagsiguro nga makaapil gyud ang tanan nilang mga sakop.
Posible nga karong semanaha mapagawas na ang resulta sa maong random drug test ug kun dunay mag positibo ipaubos pa kini sa confirmatory test sa PNP Crime Laboratory Central Office.
Dugang pa ni Torres nga ang gihingusgan karon nila nga random drug test sa kapolisan maoy kabahin sa gipahigayon nga internal cleansing sa PNP. — /MEL (BANAT NEWS)
- Latest
