600 "Flying Voters" nasakpan

CEBU, Philippines — Usa ka kanhi Kapitan sa Barangay Subangdaku sa Mandaue City ang mipasaka og kaso sa Municipal Trial Court in Cities aron mapahawa ang 600 ka gihulagway niyang mga “flying voters” sa umaabot nga piniliay.

Ang mipetisyon mao si Ernie Manatad nibutyag nga ang mga gireklamo niyang nagparehistro nga mga botante mga peke o "flying voters." Matud niya narehistro sila isip mga transferee voters gikan sa nagkalain-laing barangay sa dakbayan sa Mandaue.

Sumala pa sa petisyon, base sa field verification sa iyang legal team, nadiskubrehan nga ang mga bag-ong rehistradong botante wala nagpuyo sa mga gi-deklara nilang address.

Si Manatad nag-ingon nga gisulayan sa ilang legal team ang pagsusi sa mga newly transferred voters sa dakbyan aron malikayan ang mga flying voters.

Ang iyang team nag-deploy og mga verifiers sa mga barangay gikan Disyembre 27, 2024 hangtod Enero 20, 2025.

Sa Barangay Pagsabungan, bisan sa  usa ka bulan nilang pagpangita sa tawong nagparehistro sa address nga gibutang niini wala gyud nila kini makit-i.

Nangayo siya karon og suporta sa Comelec aron i-verify ang mga botante sa Mandaue.

“More or less sama ra gud ni sa mga scheme sa ubang partido nga voters nga wala mag reside kung asa sila nagparehistro para gamiton sa elections,” matud pang Manatad.

Sa laing bahin, si Atty. Carly Guillermo, legal counsel ni Manatad, miingon nga ilang pasakaan og kaso ang maong mga tawo apil ang mga kapitan sa barangay nga nag-isyu og mga Barangay Certificate of Residency kung mapamatud-an nga kining ang mga tawhana tinuod nga mga flying voters.

Sumala sa Comelec Resolution No. 10963, usa ka valid ID nga nagpakita sa litrato ug pirma sa aplikante igo na nga requirements para makaparehistro ug dili kinahanglan ang Barangay Certificate of Residency, basta adunay valid ID.

Ang Comelec-Mandaue, adunay 236,668 ka rehistradong botante para sa 2025 National and Local Elections.

Kampo sa Ouano

Sa kalabot nga balita gihimakak ni Mandaue Lone District Representative Emmarie “Lollypop” Ouano-Dizon ang mga akusyasyon nga gituki ni Manatad.

“Pasangil napod?. wala na gyod sila tarung mahuna-hunaan? Sayon ra ang pag-akusar. Laway ray puhunan. Mas permanente nila ang pag-akusar kaysa pagbuhat og mga kaayohan paras Mandaue,” matod ni Ouano-Dizon.

Dugang pa niya nga iyang grupo nga  One Mandaue, nag-focus lang sa paghatag og serbisyo sa mga tawo ug dili aron samokon ang ubang partido.

“Mas daghan among trabaho kaysa kyawkyaw, tungod kay kana ang gikinahanglan sa Mandaue, ug kana ang angay makuha sa Mandaue," dugang pa niya.  IBM BANAT NEWS