Kritiko ni Chan nalutsa’g warrants
CEBU, Philippines — Human migawas ang warrant of arrest sa niaging adlaw, nagpadayon gihapon ang manhunt operation batok sa tattoo artist nga kritiko ni Lapu-Lapu City Mayor Junard “Ahong” Chan.
Niadtong Huwebes, Enero 30, 2025, gimando sa Regional Trial Court Branch 27 ang pagdakop kang Humphrey Elvira tungod sa upat ka cyber libel case ubos sa Section 4 (C)(4).
Si Elvira, nga administrator sa Kamatuoran sa Opon Facebook page, kasamtangang nag-atubang sa 10 ka kaso sa cybercrime ilawom sa Republic Act 10175 o mas nailhan nga Cybercrime Prevention Act of 2012.
Ang gimandong pagdakop naglakip og piyansa nga nagkantidad og Php 48,000 alang sa temporaryong kagawasan sa akusado.
Gipahayag ni Lapu-Lapu City Police Office spokesperson Police Lt. Col. Christian Torres nga nagpadayon pa ang ilang paningkamot sa pagpangita kaniya.
Niadtong Oktubre 31, 2024, si Chan mipasaka og lima ka kaso sa cyber libel batok kang Elvira tungod sa matud pa malisyoso ug makadaot nga mga post nga nag-atake kaniya ug sa kasamtangang administrasyon.
Gibutyag sa mayor nga dawaton niya ang konstruktibong pagpanghimakak, apan ang pagpakatap ni Elvira og bakak nga impormasyon sa social media, labi na sa mga Oponganon, usa ka lahi nga isyu nga kinahanglan atubangon.
Una na niyang gipahayag nga ang lihok ni Elvira kay pamolitika, ug kini nagpatudlo sa mga kontra sa administrasyon aron pagpakatap og mga pasangil nga walay basehan.
Paglabay sa usa ka bulan, dugang lima ka cybercrime complaints, lakip ang grave threats, ang gipasaka batok kang Elvira. Gawas kang Chan, duha pa ka indibidwal ang nidangop sab sa korte.
Ang duha nga misang-at usab og reklamo mao sila si Canjulao Barangay Captain Rufo Bering ug si Louie De los Santos, ang officer-in-charge sa IT Office sa City Hall.
Si Bering mipasaka og duha ka kaso sa cyber libel ug usa ka kaso sa slander, nga nag-ingon nga si Elvira padayong ni-atake sa social media, ilabi na ang pasangil nga siya nakapahimulos sa proyekto sa sewage truck sa barangay.
Samtang si De los Santos mipasaka og reklamo alang sa grave threat human nanghagad si Elvira ug tinigbasay.
Matod pa ni Delos Santos, ang nahitabo karon kang Elvira leksyon sa uban nga magbantay sa ilang ipang-post sa social media ug masayod sa limitasyon sa balaod. IBM BANAT NEWS
- Latest
