Sakyanan natagak, drayber patay
CEBU, Philippines — Patay ang driver sa usa ka electric company samtang luwas ang kapitan ug laing kaubang pasahero human natagak ang gisakyan nila nga jeep sa pangpang sa Barangay Lanao, Lungsod sa Asturias niadtong Huwebes sa hapon, Enero 30, 2025. Ang nakalas mao si Jefferson Alloso, 37, driver/electrician sa CEBECO III, nagpuyo sa Barangay Luray, Dakbayan sa Toledo samtang naangol si Bryan Villahermosa, 29 anyos, minyo, electrician gihapon sa maong kompaniya, residente sa Barangay Tubod, Toledo City ug naluwas sila si Christian Gentapa, 33, electrician, taga Barangay Media Once, Toledo City ug si Kapitan Arnel Arnaiz.
Sa imbestigasyon sa Asturias Police Station nasuta nga ang mga electrician sa CEBECO III kuyog si Arnaiz kay nag-survey sa mga dapit sa ilang barangay nga kinahanglang matauran og linya sa kuryente.
Apan samtang nagtungas ang jeep sa dangog nga karsada , giingong na-slide ang atubangang ligid sa tuo nga bahin sa lapukon nga karsada.
Nawagtangan matud pa og kontrol ang driver ug dihang gilubag unta ang manobela nisutoy hinuon sila lahos sa pangpang.
Samtang tuod og napulo lang ka tiil ang gilawumon niini, naugbok ang sakyanan diha sa ubos ug naipit ang drayber nga si Alloso nga nakabsan sa kinabuhi.
Samdan sa ulo ang usa ka kauban niini samtang kadtong duha wala maunsa kay nakalayat. IBM BANAT NEWS
- Latest
