Patay’ng lawas sa inahan ug anak gi-awtopsiya

CEBU, Philippines — Dili pa buot hunongon sa hepe sa San Fernando Police Station Major Michael Gingoyon ang ilang imbestigasyon bahin sa misteryosong kamatayon sa manag-inahan nga nakit-an sa usa ka tolda nga temporaryo nilang gipuy-an diha sa Sitio Tamsi, Barangay Balud sa maong lungsod sa miaging adlaw nga Miyerkules.

Kagahapong adlawa, nakombinsir ug nisugot nga ipaubos sa awtopsiya ang mga patay’ng lawas sa duha aron pagtino sa hinungdan sa ilang kamatayon.

Gani bisan ang suod nga higala sa namatay nga inahan ug kanhi kaipon niini nga amahan sa 3-anyos nga apil sa napalgang patay, giimbestigaran nila sa kapulisan.

Matud ni Gingoyon, gisusi gyud nila ang maong kaso ug nanguha lang sila og mga gikinahanglan ebidensya aron madeterminar ang sirkumtansiya sa maong panghitabo.

"Ang atoang kapulisan diri ginatan-aw gyud ang tanang angle nga possible related ani nga pagkamatay sa duha nato ka victims,” sigon ni Gingoyon.

Giawhag gyud nila ang igsuon sa ginang nga ipaubos gyud sa autopsy ang mga patay’ng lawas aron mahibaw-an unsa gyud ang nahitabo kanila.

Wala gisalikway sa kapulisan ang posibilidad nga dunay kalambigitan ang insecticide nga nakuha sa crime scene pila lang ka metros gikan sa tolda.

"Initially man gud atoang first responder diri nakita gani didto sa MDRRMO nga naa man gyuy gisuka ‘tong atoang duha ka biktima," matud ni Gingoyon.

Ang pakete sa insecticide nga naa na sa kostudiya sa kapolisan napalgan sa tanom duol sa tolda nianang pagkasunod adlaw sa dihang nangita ang mga kabanay sa duha og sinina aron ipasul-ob kanila sa ilang haya.  IBM BANAT NEWS