Naaktohan nagtulod sa kinawat nga motor

CEBU, Philippines — Tulo ka mga lalake naaktohan sa mga sakop sa sa Regional Highway Patrol Group-7 nga nagtulod sa matud pa gi-carnap nga motorsiklo diha sa Barangay Lower Bagacay, Dumaguete City, Probinsya sa Negros Oriental sa miaging adlaw.

Ang mga nadakpan mao sila si alyas Lorenz taga Barangay Buntis, Lungsod sa Bacong; alyas Ron nagpuyo sa Dumaguete City ug alyas JC, residente sa Dumaguete City.

Nagkanayon si Police Lieutenant Colonel Wilbert Parilla, Regional Chief sa RHPG-7 nga usa ka babaye  taga Barangay Lower Bagacay, Dumaguete City nagpakitabang sa Dumaguete City Police Station kay gikawat iyang motor nga iyang giparking atubangan sa ilang balay.

Ang Dumaguete City Police Station daling nipahibalo sa RHPG-7 Negros Oriental aron makatabang. 

Tuod man nakit-an ang tulo nga nagtuklod sa maong motorsiklo diha sa Menciano Road, Barangay Taclobo, Dumaguete City.

Napasakaan na og kasong carnapping ang tulo diha sa Dumaguete City Prosecutor's Office.  IBM BANAT NEWS