Cebu City Hall mopatuman og rightsizing

CEBU, Philippines — Gitinguha karon sa Cebu City Hall nga mapatuman ang pagwagtang sa kapin sa napulo ka duplicate ug attached offices niining tuiga subay sa pagpatuman sa rightsizing program.

Kini matud ni Henry Tomalabcad, pangulo sa Cebu City Hall Resource Development Office (HRDO).

Ang rightsizing program unang gipaila ubos sa administrasyon ni kanhi mayor Michael Rama diin tumong niini nga mapakunhod ang gidaghanon sa mga empleyado ngadto sa 3,000.

Nunot niini, usa ka massive regularization sa mga empleyado ang gihimo aron mapun-an ang mga bakante nga plantilla positions.

Dihang nilingkod si Mayor Raymond Alvin Garcia isip local chief executive gipadayong niini ang pagpatuman sa rightsizing.

Matud ni Tomalabcad nga ilang tumong iusa ang mga opisina nga adunay doble nga mga function aron makunhoran ang gidaghanon sa mga empleyado.

Lakip niini mao ang plano sa pag-usa sa Cultural and Historical Sector sa City Cultural and Historical Affairs Commission sa Cultural and Historical Affairs Office, Fort San Pedro, Visayan Film, Public Library, ug uban pa.

Gipanglantawan usab sa city hall ang pag-usa sa tanang environmental-related nga mga buhatan sama sa Cebu City Environment and Natural Resources Office, Cebu Environmental Sanitation and Enforcement Team, Coastal Management Board, Eco Parks, Parks and Playgrounds ug ang Task Force Gubat sa Baha.

Nipasabot si Tomalabcad nga sa pagkakaron pipila ka mga buhatan adunay kalibog sa pagtino sa ilang mga mother unit samtang ang uban adunay susamang functions apan ubos sa lain-laing mga sektor.

Si Tomalabcad nagkanayon nga ilang paningkamutan nga masiguro nga gamay ra ang mga empleyado nga maapektohan niini nga abolishment.

 Gibutyag ni Tomalabcab nga adunay mga empleyado usab nga kinahanglang buhian.

Dugang ni Tomalabcad nga ilang gipadayon ang proseso sa massive regularization. BDB BANAT NEWS