Bunga sa amahanong gugma

Lami puy-an ang kakabos. Kini base sa akong naagian. Pulos wala kagraduwar og elementariya akong ginikanan. Maalarma intawon sila oras makita nga padulong nang mahurot ang bugas sa sihag namong panudlanan. Pero tungod sa kinasingkasing panaghugpong-pagpaningkamot nga inubanan sa mga pag-ampo ug pagsalig ngadto sa Labaw'ng Makagagahom, wala gyod kami magutmi. Gani, bisan humba, makatilaw mi!

Sayis anyos pa ko, gitudloan na mi sa among ginikanan og lakaw sa lagyong kilometros nga latason sa dapit among pangahoyan ug sa panahong labhan ang among bulingon didto sa tin-aw nagdagang tubig sa sapa. Maong 10 anyos pa ko, nakat-on na kog pangahoy-pagpanglaba-pagpangluto ug ubang bulohaton sa balay.

Ug gumikan ning maong matang sa pagmatuto, naani ko ang tam-is kalamposan sa kinabuhi. Nakgraduwar ko sa kolehiyo, nakatrabaho og dakong kompaniya ug nakasaad nga kon unsa man ang kapait nga akong naagian, dili ko kini ipasinati sa akong mga anak. Resulta?

Panganay kong anak nga gadako sa kaharuhay ug gipaeskuyla sa eklusibong tunghaan, di na hinuon mosakay og diyep-traysikol pasaheroan kay magtaksi g'yud oras nga dili ko mahatod-kuha sa eskuylahan. Labi na, kay nahitipon sa mga anak og adunahan.

Lahi sa tulo niya ka igsuon, kinsa didto namo paeskuylaha sa prestihiyoso gihapong eskuylahan, apan ang mga estudyanteng na-classmates mga anak og kabos. Busa, na-share nila unsa kapait ang pagpaningkamot sa ilang ginikanan aron lang sila makapadayog eskuyla.

Pagpanglabay sa pipila ka dekada, nakahupot g'yud og iya-iyang propesiyon tanan kong anak. Ug may maayo nang trabaho. Unya, ning higayon nga nasakit ako ug maglisod na paglakaw'ng mag-inusara, natagamtaman nako ilang mga kinaiya. 

Samtang gisud-ong ko akong kaugalingon nga nag-wheel chair, wala ko kapugngi pagtulo sa akong luha samtang nagtan-aw sa gisul-ob kong bag-ong sinina, bag-ong maong short ug bag-ong sapatos nga puro mahalon. Samot na, dihang miingon ang anak kong lalaki: “Kaluoy sab ni Tatay kon pirme lang daan isul-ob, nga kaniadto baya, provided gyod ta niya everything.”

“It’s about time to pay you back, Tatay Javy.” Matud pa sa kinamagulangan namong anak nga atua sa Canada, kinsa mouli dinhi sa Pilipinas karong umaabot Pebrero 10.

Kaanindot diay, sa? Kon magtanom kag amahanong gugma? Di ka gyod magmahay!