Marcos motambong og mga kalihokan dinhi sa Sugbo

CEBU, Philippines — Si Presidente Ferdinand "Bongbong" Marcos, Jr. ania sa Sugbo aron pagtambong sa upat ka dagkong kalihokan karong adlawa, Enero 29, 2025. Ang maong mga kalihokan gilangkuban sa meeting tali sa Central Visayas Regional Development Council (RDC), 20th National Convention of Lawyers, paniudto uban sa mga gobernador sa Visayas ug opisyales sa lokal nga kagamhanan ug ang inugurasyon sa alternate runway sa Mactan-Cebu International Airport (MCIA).  Gikataho nga sa meeting tali sa RDC, si Marcos uban sa ubang dagkong opisyal hisgotan nila ang kabahin sa mga prayoridad nga proyekto ug inisyatibo sa ekonomiya nga importante alang sa rehiyon sa Central Visayas.

Human sa meeting sa RDC, si Marcos motambong sa 20th National Convention of Lawyers diin ang maong kalihokan gipasiugdahan sa Integrated Bar of the Philippines (IBP).  Ang maong convention matag duha ka tuig kining ipahigayon ug karong tuiga ang tema niini mao ang "From Milestones to Horizons: Strengthening the Future of the Legal Profession".

Adunay kinatibuk-ang 3,984 ka abogado gikan sa tibuok nasud ang nitambong sa maong kalihokan.

Si Chief Justice Alexander Gesmundo ug president sa IBP Atty. Antonio Pido nitambong usab sa convention. Human sa maong kalihokan si Marcos nitambong kini sa paniudto ug meet-and-greet event kauban ang mga gobernador sa Visayas ug uban pang lokal nga opisyales sa gobiyerno sama sa mga gobernador, bise-gobernador, mayor, bise-mayor sa Lalawigan sa Sugbo, opisyales sa Dakbayan sa Sugbo ug board members.

Si Gobernador Gwendolyn Garcia nidawat ug nipasalig sa ilang lig-on nga suporta sa administrasyon ni Marcos.

Ang kataposang kalihokan sa pagbisita ni Marcos sa Cebu mao ang inugurasyon sa alternate runway sa Mactan-Cebu International Airport (MCIA).   Ang maong proyekto gitukod aron matubag ang nagkadaghan nga air traffic ug mapalambo ang operasyon sa airport ilabi na nga ang kasamtangang runway moabot na sa maximum capacity ilabi na sa peak hours.   Lakip sa mga nailhang personalidad nga nitambong sa inugurasyon mao sila si Executive Secretary Lucas Bersamin, Special Assistant to the President Secretary Antonio Lagdameo Jr., Department of Tourism Secretary Maria Esperanza Christina Frasco, Acting Presidential Communications Secretary Cesar Chavez, ug IBP President Atty. Antonio Pido. (BANAT NEWS)