Rosell nihimakak sa backlogs sa pag-aspalto sa kadalanan

CEBU, Philippines — Nihimakak si Atty. Collin Rosell, kanhi city administrator nga adunay backlogs sa pag-aspalto nga gisawo sa incumbent administration ug matud niya nga si kanhi Mayor Michael Rama nagtutok kaniadto sa road concreting nga iyang gikonsidera nga mas malungtaron nga solusyon.

Niadtong Martes, si Rama nipahigayon og press conference diin niawhag usab siya kang Rosell nga tubagon ang mga pangutana kalabot sa asphalt storm nga bag-o lang giangkon ni Cebu City Mayor Raymond Alvin Garcia nga mga gisawo nila nga backlogs.

Apan matud ni Rosell nga ubos sa administrasyon ni Rama diin nagsilbi usab siya nga city administrator kasagaran sa mga proyekto nga gipatuman mao ang road concreting. "Labaw pa sa aspalto, road concreting gani, mas labaw pa sa aspalto", ni Rosell pa. Matud ni Rosell nga gibana-banang nikabat ngadto sa P200 milyones ang budget alang sa road asphalting ang na-deliver ug gipatuman.

Ug niabot sa punto nga nangayo pa si Rama og dugang budget nga P100 milyones alang pag-aspalto nga iyang nabantayan nga gipatuman na ni Garcia.

Si Rosell nagkanayon nga ang pagpalit sa mga materiyales gihimo niadtong Hunyo 2024 usa ka buwan human gipaubos sa preventive suspension si Rama. Si Rosell adunay dala nga mga dokumento nga matud usab niya nagpakita sa mga record sa Bids and Awards Committee (BAC) sa mga proyekto sa pag-aspalto.

Lakip sa dokumento ang 64 ka barangay nga naasplato diin nikabat ngadto sa P83 milyones ang pundo nga nagahin niini.

Si Rosell nagkanayon nga ang mga proyekto usa ka kombinasyon sa road concreting ug aspalto nga iyang gikonsidera nga mas malungtaron nga solusyon alang sa mga bukirang dapit padulong ngadto sa city proper.

Mahitungod sa mga backlogs giangkon ni Rosell nga adunay pipila nga kinahanglan nga ayohon apan iyang namatikdan nga wala kini ma-monitor.

Gikataho nga samtang napatuman karon ang asphalt storm si Garcia nagkanayon nga kini nga mga proyekto nga nagtapok gikan pa sa nangaging mga administrasyon ug ang mga paglangay tungod sa daghang hangyo. (BANAT NEWS)