Wala mobayad sa utang gibunalan og tubo sa ulo
CEBU, Philippines — Natingkagol sa prisohan sa Mambaling Police Station sa Cebu City Police Office ang usa ka lalaki nga construction worker human niya giingong gibunalan og tubo ang usa ka e-bike driver tungod kay wala kini mobayad sa utang dihang iyang gipaningil diha sa Barangay Basak San Nicolas kagahapon sa kadlawon.
Ang suspetsado mao si Benito Rocaberte, Jr., 41-anyos, residente sa nahisgutang lugar.
Ang biktima mao si Junrey Oacan, 38-anyos, e-bike driver ug silingan sa suspetsado.
Base sa imbestigasyon sa kapolisan sa Mambaling Police Station giingong gipangil sa suspetsado ang biktima sa utang niini nga P1,000. Apan giingong nibalibad ang biktima kay wala pay kwarta nga ikabayad hinungdan nga nasuko ang suspetsado ug nikuha kini og tubo ug gibunal ngadto sa ulo sa biktima.
Daling gidala ang biktima diha sa Cebu City Medical Center samtang ang suspetsado nasikop dayon kini sa gihimong follow-up operation sa kapolisan.
Ang suspetsado kinsa nangayo og pasaylo gikatakdang pasakaan og kasong physical injury. (BANAT NEWS)
- Latest
