Menor na-rescue atol sa buy-bust operation sa kapolisan

CEBU, Philippines — Usa ka menor de edad ang na-rescue ug walo ka ilegalista ang nadakpan sa mga operatiba sa Philippine Drug Enforcement Agency (PDEA)-7, Sawang Calero Police Station  Parian Police Station ug Mabolo Police Station sa Cebu City Police Office.

Nipahigayon og buy-bust operation ang PDEA Bohol Provincial Office, PNP Bohol Maritime Police ug Tagbilaran City Police Station ngadto sa Barangay Taloto, Tagbilaran City, Probinsiya sa Bohol sa niaging adlaw.

Nadakpan nila ang suspect nga si alyas “Justine”, 26-anyos, walay trabaho, nagpuyo sa Barangay Booy, Tagbilaran City.

Nasakmit sa kapolisan gikan sa suspetsado ang 11 ka putos nga shabu nga nitimbang og 55 gramo ug nibalor ngadto sa P374,000, buy-bust money ug cellular phone.

Samtang ang PDEA Negros Oriental Provincial Office ug PNP Regional Intelligence Unit-7 Negros Oriental Provincial Intelligence Team nihimo usab og buy-bust operation sa Barangay Tubtubon, Sibulan, Negros Oriental.

Napuhag ang usa ka drug den ug tulo ang nadakpan ug usa ka menor de edad ang na-rescue nga sila si alyas “Angelo”, 30-anyos ug kakunsabo niini nga si alyas “Silvino”, 64- anyos; tigbisitahan sa drug den nga si alyas “Roberto”, 58-anyos, pulos walay mga trabaho ug nagpuyo sa naasoy nga dapit.

Na-rescue sa maong operasyon ang 16-anyos nga grade 10 student ug nagpuyo usab sa maong barangay.

Nasakmit sa mga operatiba ang walo ka putos sa gituohang shabu nga nitimbang og pito ka gramo ug nikabat ngadto sa P47,600.

Sa laing bahin, nadakpan sa Parian Police Station ang 31-anyos nga lalaki sa ilang buy-bust operation diha sa Sitio BSJCO, Barangay Tisa, Cebu City.

Ang suspect mao si alyas “John”, 31-anyos, nagpuyo sa F. Villa Street, Barangay T. Padilla niining siyudad.

Nasakmitan kini og 10 ka gramong shabu nga nagkantidad ngadto sa P68,000.

Samtang ang kapolisan sa Mabolo nipahigayon usab kini og buy-bust operation sa managlahing lugar sa Barangay Mabolo.

Sa unang operasyon diha sa Sitio Lahing-Lahing nasikop si alyas “Clyde”, 18, nagpuyo sa Sitio Upper, Barangay Carreta ug nasakmitan kini og tulo ka gramong shabu ug kalibre .39 nga revolver.

Ug ang sunod nga operasyon nasikop diha sa Sitio San Isidro si alyas “Ayeng”, 21, taga Sitio Marna, Barangay Subangdaku, Dakbayan sa Mandaue.

Nakuhaan kini og 5.25 gramo nga shabu nga nikantidad og P35,700.

Samtang ang Sawang Calero Police Station nagpahigayon usab og buy-bust operation diha sa Sitio Omega, Barangay Sawang Calero niining siyudad.

Nasikop sa maong operasyon si alyas “War”, 18, nagpuyo sa 157 C. Padilla Street, Barangay Duljo Fatima ug nakuhaan kini og 65.42 gramo nga shabu nga nibalor og P444,856. Sa laing bahin usab, nikabat sa P500,000 ang kantidad sa shabu nga nasakmit gikan sa high value individual sa atol sa drug operation sa kapolisan sa Dakbayan sa Talisay diha sa Barangay Cansojong kagahapon sa kadlawon

Ang suspetsado mao si Mc John Matulin, 27, taga sSitio Babao Youth, Barangay Inayawan, Siyudad sa Sugbo. (BANAT NEWS)