CHR mibisita sa inahan ug duha ka anak nga gipanigbas patay
CEBU, Philippines — Niadto ang mga personnel sa Commission on Human Rights (CHR) sa haya sa 32-anyos nga inahan ug sa 2-anyos ug 11-anyos nga mga bata diha sa Barangay Lutac, dakbayan sa Naga kagahapon sa buntag, Miyerkules, Enero 29, 2025.
Kahinumduman nga si Junelyn Gimenez ug ang duha ka mga anak niini gitigbas ug giloglog ang liog sa ilahang padre de pamilya nga si Carlo Camporedondo.
Nihimo og kaugalingon nga imbestigasyon ang CHR-7 mahitungod sa maong linuog nga krimen, hinoon wala na sila niatubang sa mga tigbalita.
Ang suspect padayon nga naka hospital arrest ug pasakaan kini og kasong murder ug two counts of parricide karong adlawa.
Nasayran ang kagamhanan sa dakbayan sa Naga nihatag na og tabang alang sa pagpalubong sa mga biktima ug uban pang mga panginahanglanon sa nabiyaang pamilya.
Usa sab ka pribadong indibidwal ang nipaabot og tabang sa 7-anyos nga anak sa biktima nga wa maapil sa pagpatay tungod kay nitungha kini atol sa pagkahitabo sa krimen.
Karong Sabado matod pa ilubong ang mga biktima.
Samtang si Police Colonel Jovito Atanacio, Provincial Director sa Cebu Police Provincial Office(CPPO) nisuroy sa mga police stations ug nagpahigayon og social awareness ug gidasig ang katawhan nga moreport gilayon sa kapolisan kun makasinate og mga pagpangabuso. (BANAT NEWS)
- Latest
