Rama mopasaka og disbarment batok kang Garcia
CEBU, Philippines — Mopasaka og kasong disbarment si dismissed mayor Michael Rama batok kang Cebu City Mayor Raymond Alvin Garcia gumikan kay giingong nilingkod ang naulahi isip mayor nga walay tukmang legal nga mga dokumento.
Si Rama nipabilin sa baruganan sa iyang pasangil kang Garcia nga nangilog kini sa awtoridad sa pagkamayor ug nipasangil nga ang iyang pagkasuspenso ug pagkataktak sa posisyon wala pay opisyal nga hukom ug mao kini gihimong basehanan ni Garcia sa pag-asumir sa katungdanan.
Ang disbarment usa kini ka legal nga proseso aron dili na makapadayon ang usa ka abogado sa iyang propesyon.
Ang abogado ni Rama nga si Atty. Collin Rosell nibutyag nga hangtud karon wala pa ma-serve kang Rama nga na-dismiss na kini sa katungdanan.
“Walay gi-serve ug walay giimplementar nga si Mayor Michael Rama dismissed from service, until now”, matud ni Rosell.
“Kinahanglan gyud nga aduna gyu’y dokumento ang tanan kong mohupot og posisyon aron nga legal gyud tanan ang gipanghuptan”, ni Rossel pa.
Hugtanon na usab ang hukom ni Rama nga mopasaka sa maong kaso batok kang Garcia gumikan kay wala pa gyud mahuman ang iyang termino ug matapos pa kini sa Hunyo 2025 kon ugaling adunay mapili nga bag-ong mayor sa siyudad. BDB BANAT NEWS
- Latest
