Luna gidonar alang sa CNU-Argao campus

CEBU, Philippines — Usa ka pribadong indibidwal ang midonar og lima ka ektarya nga yuta niini sa lungsod sa Argao ngadto sa Cebu Normal University (CNU) alang kini sa katukoran og extension campus sa CNU didto sa maong lungsod.

Si Victor “Badjon” Egos Jr. maoy midonar sa lima (5) gikan sa 70 ka ektarya nga luna niini duol sa Taloot alang sa maong tunghaan diin gipirmahan ang deed of donation niadtong Enero 24. Si Argao Mayor Allan Sesaldo nagpasalamat sa maong indibidwal sa paghatag sa iyang luna nga plano sa LGU nga tukoran og koral aron masiguro ang seguridad sa mga tinun-an.

“We promise that we will develop the road going to CNU-Argao and this will be smooth-sailing because Governor Gwen Garcia will immediately act on it” matod ni Sesaldo kinsa midugang nga dili sab angay problemahan ang tubig sanglit ang maong dapit duol sa tinubdan sa tubig sa Argao.

Ang Presidente sa CNU nga si Dr. Daniel Ariaso Sr., nagkanayon usab nga wala silay problema asa ang tukoran sa maong tunghaan basta ang importante maserbisyohan niini og tarong ang lungsod ilabina ang mga estudyante.

Kagahapong adlawa, gipasar sa House Committee on Higher and Technical Education ang balaudnon o House Bill No. 11258 pag establisar og regular nga campus sa CNU sa lungsod sa Argao nga tawagon nga Cebu Normal University -Argao Campus. (BANAT NEWS)