Bishop Labajo iinstalar nga Obispo sa Diocese of Prosperidad

CEBU, Philippines — Usa ka mabulokon nga pagdawat sa pag-abi-abi ang nisugat ni Bishop Ruben Labajo, D.D atol sa pag-abot niini sa pantalan sa Nasipit Agusan Del Norte, kagahapon sa buntag uban sa mga kaparian ug layko gikan sa Archdiocese of Cebu.

Gisugat si Labajo sa mga sayaw ug banda uban sa red carpet sa mga kaparian ug opisyal sa Diocese of Butuan sa pantalan.

Human niini nilahos ang team ni Labajo uban sa mga bisita gikan sa Cebu sa palasyo sa Diocese of Butuan alang sa pamahaw ug pipila ka gutlo nilahos na dayon sa Diocese of Prosperidad ang tanan.

Unang nibisita sa Cathedral si Labajo, diin gipatingog ang kampana ug ang pag-ampo sa makadiyot niini sa simbahan.

Nakig-atubang dayon si Labajo sa mga sakop sa tigbalita ug kini mapasalamaton sa maayong pag-abot niya sa prosperad ug kini nipasalig nga iyang dalhon ang mga maayong buhat nga iyang nahimo sa Sugbo sa iyang bag-ong Diocese ug nipasalig nga maduolan gayud siya sa mga magtutuo ug sa katawhan.

Karong adlawa, Enero 28, ipahigayon ang pag instalar ni Labajo isip unang obispo sa Diocese of Prosperidad. (BANAT NEWS)