CEBU, Philippines — Nipasalig ang Department of Social Welfare and Development (DSWD) nga padayon nilang suportahan ug hatagan og gahum ang mga estudyante sa social work aron mapalig-on ug mapalambo ang propesyon sa social work sa nasod.
Gipadayag kini ni DSWD Secretary Rex Gatchalian atol sa ilang kalihukan nga giulohan og, 'Dialogue with Social Work Students,' nga adunay tema nga 'Bridging the Gap between Theory and Practice,' nga gipahigayon pinaagi sa virtual platform ug on-site event sa University of Cebu -Banilad Campus sa dakbayan sa Sugbo.
Si Gatchalian nagkanayon nga ang dayalogo nagtumong sa pagpataas sa ilang moral ug pagpasalig kanila sa suporta sa ahensya, ilabi na ang paningkamot niini sa pagpausbaw sa mga oportunidad sa pagkat-on ug pagpalambo sa mga social worker.
Usa sa mga paningkamot niini mao ang umaabot nga paglusad sa bag-ong gi-renovate nga DSWD Academy, nga naghatag og globally-competitive capacity-building opportunities pinaagi sa paggamit sa international ug local resource materials sa social welfare and development ingon man sa social protection.
Gawas pa niana, ang diyalogo nagtipon sa mga eksperto aron hisgutan ang mga career options alang sa social work degree holders, mga misconception o stereotypes sa propesyon, ug uban pa. (BANAT NEWS)