Garcia nipasabot kabahin sa pag-aspalto sa mga dalan

CEBU, Philippines — Gibutyag ni Cebu City Mayor Raymond Alvin Garcia nga sa nakalabay nga tulo ka tuig, wala naka-aspalto og dalan ang kanhi administrasyon sa Dakbayan sa Sugbo.

Natuki ang maong isyu human nga mipadayag ang konseho sa dakbayan ngadto sa Department of Engineering and Public Works (DEPW) nga hinay ang kalambuan sa pag-aspalto sa mga karsada.

Matud pa ni mayor Garcia atol sa press conference kagahapong adlawa nga ang dalan sa South Road Properties ang nauna og aspalto tungod kay mao kini ang gigamit sa Sinulog route sulod sa duha ka tuig.

Si Garcia mipasabot nga ang pagkalangay sa pag-aspalto dili tungod sa bureaucratic issues, tungod kay napalit na ang mga asphalt materials, apil sa hinungdan mao ang kadaghan usab sa request sa mga barangay ug dili nila kini madali.

“But all other areas of Cebu City, zero. Mao nga karon pa ni nisud ang atong aspalting. Can you imagine 80 barangays? Di nana nato mapaspas”, suma pa ni Garcia.

Dugang pa ni Garcia nga kun kuwang ug hinay ang pag-aspalto sa pagkakaron tungod kini kay kuwang ang mga tawo nga moaspalto tungod kay lima ra grupo ang tig aspalto sa siyudad.

Una niini ang konseho sa siyudad sa Sugbo mituki sa gihimong pagpang aspalto sa karsada karon nga nagkaduol na ang eleksyon.

Pipila sa mga miyembro sa konseho ang mihulagway nga naatol gyud sa panahon nga nagkaduol ang eleksyon ang gihimong mga proyekto bisan og kini naduso na pipila ka tuig na ang nakalabay.

Apan suma pa ni Garcia nga daghan sa mga karsada ang wa gyud maaspalto sa milabay nga napulo na ka tuig sa miaging administrasyon.

Gipasalig ni Garcia nga paningkamutan niya nga ubos sa iyang administrasyon nga mahatagan og aksyon ang mga hangyo sa matag barangay sa pag-aspalto sa mga dalan ilabi na sa bukirang bahin diin daghan pa gyud ang libaong nga mga karsada. (BANAT NEWS)