Archival: Ayuda gigamit pamuntos para sa eleksyon

CEBU, Philippines — Gihulagway ni Konsehal Nestor Archival Sr. ang sunod-sunod nga mga dole out o ayuda nga gihatag sa Cebu City Government isip political advantage sa incumbent alang sa 2025 midterm elections. 

Kini human siya mipasangil nga pipila ka budgetary allocations sa dakbayan ang gi-realign alang sa livelihood support.

Sa pakighinabi sa The Freeman/Banat News kagahapon, si Archival niingon nga naabot sa iyang atensyon nga gi-realign na ang budgetary allocations alang sa Parks and Playgrounds nga mokabat sa P120 milyones.

“Karon sa akong nahibaw-an didto sa mga tawo sa Parks (and Playgrounds Department), wala naman kuno diha ang kwarta, these are some information that I got,” matud ni Archival.

Matud ni Archival, kini ang nag-aghat kaniya sa pagduso og usa ka resolusyon, nga bag-o lang giaprobahan sa konseho, nga nanawagan alang sa usa ka executive session aron masubay ang mga budget allocations alang sa bag-ohay nga mga dole out.

Partikular niyang gitumbok nga bag-o lang gipahibalo sa executive branch nga 9,000 ka indibidwal makadawat og P4,000 nga hinabang matag usa.

Gipanglantawan ni Archival nga kining mga budget posibleng gikan pa sa 2024 allocations nga gibalhin niining tuiga.

Dugang pa niya nga angay nilang mahibaw-an kung adunay bisan unsang budget realignment, tungod kay wala kunoy proposal nga miagi sa legislative table.

“Mao ng na alarm mi kay ang uban nga mga services dili na nato mahatag kay ihatag man nila og cash padung sa mga tawo nga para nako wa gyuy gamit,” matud ni Archival.

Sa iyang personal nga baruganan, si Archival, kinsa modagan sa pagkamayor karong midterm election, nagtan-aw niining mga pamaagi sa dole-out isip usa ka politikanhong pamaagi sa "pagpalit" sa mga boto.

Ang sistema sa dole-out o ayuda usa sa mga init nga diskusyon nga gitumong sa konseho atol sa deliberasyon sa annual budget.

Una ng gidepensahan ni Cebu City Mayor Raymond Alvin Garcia ang sistema sa dole-out, nga niingon nga dili makatarunganon ang pag trim sa di mominos P100 milyones alang sa panginabuhian o economic grants, nga alang kaniya gikinahanglan sa katawhan.

Matud niya, ang iyang plano mao ang paghatag ug libreng uniporme, bag, ug mga gamit sa mga tinun-an sa pampublikong tunghaan.

Apan matud ni Archival nga walay dole-out system sa dakbayan sa Sugbo nga milambo.

Si Archival miingon nga naglibog siya kon nganong ang gobyerno nagpadayon gihapon sa paghatag og mga donasyon alang sa mga naapektuhan sa Bagyong Odette, bisan pa nga kini nahitabo mga tulo ka tuig na ang milabay.

Dugang pa niya nga walay konkretong report sa mga benepisaryo sa maong mga ayuda, samtang ang uban nangayo og katin-awan sa ilang buhatan kun unsaon pag-apply alang sa livelihood support alang sa mga kabus sa siyudad.

Kini, matod niya, nagpamatuod nga dili tanan ang nakabenepisyo sa sistema sa dole-out. Tungod niini, nakita ni Archival nga usa kini ka advantage alang sa incumbent officials sa lumba alang sa 2025 midterm elections.

“Mao ni klaro nga para nako, gigamit nila ang resources sa gobiyerno para modako ilang puntos in a way,” matud ni Archival. (BANAT NEWS)