Bagsakan sa SRP, wala pa gihapon mahuman

CEBU, Philippines — Nanawagan ang Cebu City Council og katin-awan sa Department of Engineering and Public Works (DEPW) sa pagkalangay sa konstruksyon sa Central Visayas Food Terminal sa South Road Properties (SRP) human nasayran nga gisuspenso ang civil works niini niadtong Marso 2023.

Kini nga aksyon sa konseho naggumikan sa resolusyon ni Konsehal Philip Zafra atol sa labing ulahing regular session.

Sa pakighinabi sa The Freeman/Banat News kagahapon (Domingo), si Zafra nagkanayon nga usa lang kini sa mga proyekto nga gustong ma-update ang konseho kalabot sa mga kalamboan sa imprastraktura sa dakbayan.

Gipasabot ni Zafra nga ang maong proyekto mao unta ang Bagsakan Center alang sa mga mag-uuma, nga gipasiugdahan sa Department of Agriculture.

Matod niya, ang maong pundo gigahin na ug gi-release niadtong 2021, atol sa paglingkod ni kanhi Mayor Edgardo Labella.

Matod ni Zafra nga nahunong ang proyekto tungod sa mga reservations sa pipila ka mga opisyal sa administrasyon niadtong higayona, tungod ang SRP gikonsiderar nga usa ka premium nga lote.

Apan niadtong Marso 2022, ubos sa pagpangulo ni kanhi Mayor Michael Rama, ang proyekto gilihok pagbalik aron kini matukod, apan hangtud karon wala pa gihapon nahuman ug  walay klaro ang mga katarungan nga gihatag kun nganong nalangan.

Matud sa gipakita nga sulat nga gilakip sa tubag sa DEPW, ang proyekto gi-isyuha og usa ka suspension order kaniadtong Marso 24, 2023, nga adunay 81.67% sa trabaho nga nahuman. Ang proyekto gihimo sa NRMM Construction and Development Corporation.

Si Zafra miingon nga ang Bagsakan dako og gamit para sa tanan gikan sa mga mag-uuma hangtud sa mga konsumidor kay wholesale ang pagbaligya sa mga abot ug mas barato.

Mamenosan sab ang konsentrasyon sa mga mangomprahay sa Carbon Public Market.

"So gani, if mahuman na gyud ni, if ma functional na gyud ni, we are looking at the possibility of building another Bagsakan Center; the more Bagsakan centers there are, the better, para ma-disperse nato ang mga tawo," matud pang Zafra.

Gibutyag ni Zafra nga duna pay ubang mga proyekto sa siyudad nga gihunong sab ang pagtrabaho mao nga gusto nilang madungog gikan mismo sa DEPW unsay mga hinungdan.

Si Zafra niingon nga kinahanglan nilang sutaon kung gikinahanglan ba ang legislative intervention pinaagi sa usa ka ordinansa.

Dugang pa niya nga ang executive session mao usab ang magdeterminar kung makatarunganon ba ang mga hinungdan sa mga kalangan. (BANAT NEWS)