Garcia nangayo og suporta sa mga negosyante

CEBU, Philippines — Naghangyo og suporta gikan sa mga negosyante si Cebu City mayor Ramond Alvin Garcia aron mapadayon ang iyang pagdumala sa siyudad ingon man ang iyang mga proyekto ug mga plano alang sa dakbayan sa Sugbo.

Kini atol sa Philippine Economic Briefing: Navigating 2025 nga gipasiugdahan sa Cebu City Chamber of Commerce and Industry uban sa City of Cebu diha sa City Sports Club.

Sa tahu sa Cebu City PIO, si Garcia sa iyang pagpamung sa kalihukan nipasigarbo nga ang Cebu nagpabilin nga premier investment destination sa Asia-Pacific region.

“Our location alone gives us access to key markets, both domestic and international, making Cebu the ideal place to start, expand, and grow your business”. suma pa ni Garcia.

Gipadayag usab sa mayor nga ang Cebu nagpabilin nga richest province sa nasud pinaagi sa gipakita niini nga steady growth sa nanglabay nga katuigan, diin miabot og trillion-peso GDP sa tuig 2023, diin ang Cebu City nakabaton og growth rate nga 8.3%.

Dugang pa ni Garcia nga makita usab dinhi sa Cebu ang mga top-performing schools nga naka-produce og mga maayong trabahante sama sa USC, USJR, CIT-U, UC, UP Cebu, Cebu Doctors’ University, ug Cebu Institute of Medicine.

Gipasigarbo usab ni Garcia nga samtang siya nagserbisyo sa konseho niadtong tuig 2019 iyang giduso ang mga lakang aron mahimong business friendly ang dakbayan pinaagi sa local ordinance sama sa paghatag og lugway sa validity sa business permits ngadto sa duha ka tuig ug nipasar og ordinansa nga naghatag og amnestiya sa mga delinquent tax payers.

Sa dihang siya nahimong mayor gipadayag ni Garcia nga nipirma siya og executive order nga nag implementar sa national law nga naghatag og relief ngadto sa mga real property tax payers.

“Continuing to recognize the need for ease of doing business, my administration has always endeavored towards such ends, and if my words are not enough, I do hope that the results will speak for themselves,” suma ni Garcia.

Gipasalig usab ni Garcia nga ang ilang maayong relasyon tali sa Provincial Government nga gidumala sa iyang iyaan nga si Governor Gwendolyn Garcia makahatag og potensyal nga magkahiusa ang Sugbo alang sa mas lig-on nga ekonomiya.

Pinaagi niini si Garcia nga mokandidato pagka mayor sa umaabot nga piniliay naghangyo sa business sector nga padayon nga mosalig og mosuporta kaniya.

 “As I stand before you today, I humbly ask for your continued trust and support”, suma pa ni Garcia.