Edukahon bahin sa gun ban, checkpoint guidelines

CEBU, Philippines — Gihangyo karon sa konseho sa dakbayan sa Sugbo ang Association of Barangay Councils (ABC) nga mohimo og educational campaign sulod sa ilang hurisdiksyon bahin sa mga guidelines nga gipatuman alang sa gun ban ug checkpoints sa Commission on Elections (COMELEC).

Usa ka resolusyon ang gisang-at ni Konsehal Rey Gealon nga giaprobahan sa konseho atol sa labing ulahing regular session niini nga nagtuki bahin sa nationwide gun ban sa Comelec nga nagsugod niadtong Enero 12, 2025, subay sa panahon sa eleksyon sa Mayo 2025.

Ubos sa gun ban, ginadili ang pagdaladala og mga armas ug uban pang delikado nga hinagiban, gawas sa otorisadong mga indibidwal, isip kabahin sa mga lakang aron mapugngan ang kagubot nga may kalabutan sa eleksyon.

Ang resolusyon nikutlo sab sa pamahayag sa tigpamaba sa Comelec nga si John Rex Laudiangco nga bisan ang mga toy guns ug mga replica niini sakop gihapon sa gun ban.

Tungod niini, gimando sa maong resolusyon ang pagpahigayon og lapad nga information campaign, edukasyon, ug komunikasyon nga makatabang sa pag-edukar sa mga residente bahin sa gun ban ug bahin sa mga lagda, silot, ug exemptions niini.

Laing resolusyon sab ang giduso nga nagmando sa ABC pagbutang og mga paskin bahin niini ug ingon man ang kalabot sa mga katungod sa mga indibidwal o motorista diha sa mga checkpoints.

Ang resolusyon usab nipahinumdom sa mga polis ug kasundalohan nga nagbantay sa Comelec checkpoints nga wala sila gitugotan nga pugson ang mga motorista nga ablihan ang ilang mga trunks, glove compartments, u-box,  o mga packages.

Apan mahimong mangutana, mananghid ug dili mandoan ang mga motorista nga paablihan ang mga gidili paablihan ubos sa “plain view doctrine” ug kana kun tugotan sila niini o kung adunay krimen nga nahitabo nga nasaksihan mismo sa maong mga polis.

Ang ikatulo nga resolusyon ni Gealon, nga giaprobahan usab sa konseho, naghangyo sa kadagkoan sa Cebu City Police Office nga tugotan silang mohimo og random inspections sa tanang police checkpoints sa sulod sa siyudad aron pagsusi kun gisunod ba usab sa mga polis ang mga protocol ug standards ug pagsiguro sa transparency. (BANAT NEWS)