Magkuha sa anak, gipusil patay

CEBU, Philippines — Patay ang usa ka amahan human kini gipusil sa riding-in-tandem sa Sitio Danao 2, Barangay Valencia, dakbayan sa Carcar, Biyernes sa hapon, Enero 24, 2025.

Ang biktima mao si Randy Camacho Suico, 41-anyos, residente sa naasoy nga lugar.

Nakadawat og tawag gikan sa concerned citizen ang Carcar City Police Station labot sa nahitabong pagpamusil ug dali nila kining gi respondehan.  Sa inisyal nga imbestigasyon sa Carcar City Police Station ang biktima samtang nagmaneho sa iyahang motorsiklo paingon sa Carcar City Proper aron unta kuhaon iyahang anak nga babae sa eskwelahan.

Apan pagabot niini sa nahitabo, usa ka wala pa mailhing mga lalaki nga sakay sab og motorsiklo nga nagsunod kaniya ang kalit nga misikit ug diretso siyang gipusil sa makadaghang higayon.

Nadala pa sa Carcar Provincial Hospital ang biktima apan nakabsan gyud kini sa kinabuhi.

Samtang ang mga mamumuno daling miikyas human mahimo ang krimen.

Padayon pa ang imbestigasyon sa kapulisan labot sa maong pagpamusil. (BANAT NEWS)