Gun ban higpit nga gipatuman sa Bohol Police

CEBU, Philippines — Mas gihingusgan sa Bohol Police Provincial Office(BPPO) ang ilang pagpatunan sa nationwide gun ban subay sa nagkaduol nga Local ug National Elections karong May 2025.

Sa ilang nanglabay nga mga operasyon, lima ka indibidwal ang ilang gidakop sa managlahi nga operasyon sa probinsya gikan sa Enero 12 hangtud sa Enero 23, 2025 tungod kay nakalapas sa gun ban.

Ang operasyon nahitabo sa Tagbilaran City, Talibon, Guindulman, Jagna ug San Isidro.  Naa sa kustosdiya sa kapulisan ang armas ug mga bala ug gipaubos na sa verification ang mga dokumento.

Si BPPO Provincial Director Police Colonel Arnel Banzon mitataw sa importansiya sa estriktong pagtuman sa gun ban aron masiguro ang malinawon ug hapsay nga eleksyon.

"The Bohol Police Provincial Office remains steadfast in its commitment to maintaining public safety during this critical period. We urge everyone to abide by the gun ban to ensure an orderly election process," sigon ni Banzon.

Isip kabahin sa proactive measures, ang BPPO ni-establisar og daghang checkpoints ug gihingusgan ang patrol operations aron mapakgang ug matubag ang kalapasan sa gun ban.

Samtang sa pikas bahin nadakpan sa kapulisan sa San Remigio Municipal Police Station ang usa ka 43-anyos nga lalake kay gialarma nga armado ug nakuhaan pa gyud og armas sa Purok Mahigugmaon, Barangay Luyang, Lungsod sa San Remigio sa miaging adlaw.

Ang suspek mao alyas Rondell, residente sa naasoy nga lugar.  Sa impormasyon sa San Remigio Police Station ang suspect naaktuhan sa kini nga nagdala-dala og armas dihang gi-alarmahan.

Nasakmit gikan kaniya ang kalibre .22 nga revolver ug nakuhaan sab kini og duha ka putos sa gituohang shabu.  Gidala sa police station ang suspetsado ug napasakaan og tukmang kaso. —Decemay P. Padilla/IBM

Namatay atol sa sunog sa Mandaue

Nagbilin og P3.2 milyones ka pesos nga danyos ug usa ka kinabuhi ang nakalas ang sunog nga nahitabo sa Sitio Pokang, Barangay Looc ug Sitio Orchids Barangay Opao, Mandaue City, Huwebes sa gabii.

Ang sunog naglambigit kini og kabalayan nga giingong diha nagsugod sa balay sa usa ka Wenjel Fuentes.

Ang sunog nadawat sa kabomberohan alas-5:21 ug  hingpit nga na fire out alas 7:33 na sa gabii.

Usa ka 62-anyos nga ginang kinsa nakaangkon og 1st degree burns sa iyang tuo nga kamot, sa pag-abot sa responding team wala na kini panimuot ug hinay na kaayo ang iyang pulso ug pagginhawa.

Dali kini nga gidala sa tambalan apan mga alas 2:30 sa kadlawon adlaw nga Sabado gikatahong nabugtoan kini sa iyang kinabuhi tungod sa acute myocardial infraction o atake sa kasing-kasing.

Sa kasikbit nga sitio Orchids nga sakop na sa Barangay Opao nga naapil sab sa maong sunog niabot og 55 ka balay ang hingpit nga naugdaw. Nawad-an og panimalay ang 64 ka pamilya o 234 ka tawo.

Samtang sa Barangay Looc, 56 ka panimalay ang naugdaw adunay 246 ka pamilya o 309 ka individuals ang nawagtangan sa ilang pinuy-anan.

Padayun pang gisubay sa kabomberohan ang mga pasangil sa mga nasunogan nga usa ka bata nga naglung-ag apan iyang nataligam-an ang hinungdan sa pag-ulbo sa kalayo nga dali kaayong nikatap sa mga silingan.

Sumala pa sa kabomberohan, kalab-anan sa mga panimalay ginama sa light materials ug naa sab sila sa suok ug sudlonon nga bahin sa maong sitio mao nga hasta ang mga bombero naglisud nga makapaduol dayon sa tinubdan sa sunog.

Ang kapitan sa Barangay Looc nga si Kapitan Raul Kevin Cabahug, nibutyag nga ipahimutang usa niya sa Barangay Looc ang mga nasunogan.

Makighinabi siya sa prinsipal sa tulonghaan duol sa mga nasunogan kung makagamit ba sila og lawak-saringan aron mahimo nga kasamtangan nga kapuy-an sa mga biktima ilabi na nga aduna pay mga klase.

Ang kabomberohan pinangulohan ni FO1 Neil Ian P Amancio lead Investigator uban sa ground commander F/Supt. Arnel Abella padayon pa sa ilang imbestigasyon sa hinungdan sa maong sunog.

Gihatagan na karon og pagtagad sa lokal nga kagamhanan sa Siyudad sa Mandaue ang mga nasunogan sama sa tubig, pagkaon ug uban pa nilang mga panginahanglan samtang sila gibahig sa pagpahiluna sa duha ka mga evacuation centers.

Si Mayor  Glenn Bercede ang mimando karon sa buhatan sa City Social Welfare and Services Office (CSWSO) sa pagpadangat gilayon sa mga panginahanglan sa mga biktima uban usab sa buhatan sa City Health Office (CHO) alang sa pag-atiman sa ilang panglawas.

Si Dr.  Michael Allan Pialago,  ang nag-atiman sa duha ka evacuation centers pinaagi sa pagpadala og 13 ka mga personnel sa  gym sa Looc ug 10  usab ka mga personnel sa SCWSO  sa Opao gym.

Samtang sa sunog nga niulbo sab sa Lapu-Lapu City, si Mayor Junard "Ahong" Chan personal nisusi sa mga nasunogan sa Sitio Sangi  sa Barangay Pajo sa Siyudad sa Lapu-Lapu.

Ang mga biktima temporaryo karon nga gipahiluna sa gym  sa Barangay Pusok  ug gihatdan na og tabang sa City Social Services Office (CSWSO). (BANAT NEWS)