Sinulog sa Carmen karong adlawa

CEBU, Philippines — Sa pagsaulog sa lungsod sa Carmen sa ika-52 nga Sinulog sa Carmen karong tuiga, pipila ka executive orders ang giluwatan ni Mayor Carlo Villamor  aron sa pagpasara sa pipila ka dalan sa lungsod, parking sa sakyanan ug pagsuspenso sa klase ug trabaho sa gobiyerno alang sa kalamposan niini karong adlawa, Enero 26.

Sa bag-ong giluwatan nga EO ni Villamor, mideklarar kini nga suspendido ang klase ugmang adlawa Enero 27 gikan sa elementarya hangtod sa college sa lungsod sa Carmen.

Kini aron nga mahatagan og igong pahuway ang mga performers human sa selebrasyon karong adlawa.

Matud ni Villamor nga tungod kay kasagaran sa mga dancers o performers sa mga contingents nga apil sa street dancing ug ritual showdown sa Sinulog sa Carmen,  mga tinun-an sa lungsod, angayan ra pud nga hatagan sila og adlaw nga makapahulay.

“In light of the Sinulog sa Carmen celebration and to give participants and the Carmenhanons time to rest. It is justifiable to suspend classes in all levels of public schools and work in the government,” pagbasa sa EO ni Villamor, penetsahan Enero 23, 2025.

Alang sa trabahante sa gobyerno, ang Mayor nagkanayon nga ipatuman ang skeletal force base sa rekomendasyon sa mga department heads aron makapadayon paghatag og serbisyo sa gobyerno, gawas sa  Municipal Health Office ug sa Disaster Risk Reduction and Management Office sanglit mga frontline offices man kini.

Sa mga pribadong establisemento, anaa na nila ang pagdesisyon kun suspendido ba pud ang trabaho.

Samtang, sa pagselebrar karon adlawa sa Sinulog 2025 sa lungsod sa Carmen, aduna pud mga dalan nga gipasirad-an kon asa ipahigayon ang street dancing sa nagkadaiyang contingents.

Sugod alas 8 sa buntag hangtod alas 11 sa gabii karong adlawa, ang Starting 8 am today up to Kamuning St. Poblacion ug ang P. Gecain St. of Dawis Norte ang sarado sa mga sakyanan.

Ang mga residente ug mga bisita giawhag nga maglakaw na ang gikan ug padulong sa simbahan hangtod sa grandstand.

Aduna puy designated areas nga mamahimong i-park ang mga sakyanan apil na niini ang the CTU Carmen, Carmen Memorial Park open space ug silingang dapit sa Dawis Norte; Camara property ug silingang dapit sa  Poblacion; ug Shemberg Biotech property ug silingang dapit sa Cogon West.

Ang tibook dalan Climaco ang sarado pud sa mga magparking nga sakyanan sugod 12:01 am sa Enero 26 hangtod 12:01 am sa Enero  27, sanglit ang maong dalan magsilbi man nga alternatibong dalan sa mga sakyanan nga moagi. Kadtong mga adunay molapas sa gilatid nga regulasyon sa dalan hilabina sa mga sakyanan, mamahimong mamultahan ug itow pa ang sakyanan.