Duha ka drayber nag-sideline pagpamaligya’g shabu, sikop

CEBU, Philippines — Gitanggong karon sulod sa detention cell ang duha ka mga driver nga nadakpan sa managlahing operasyon sa kapolisan sa Dakbayan sa Lapu-Lapu ug Mandaue City. Unang nadakpan ang usa ka company driver nga nasuta nga nag-sideline pud sa pagpamaligya og ilegal nga drugas atol sa buy bust operation sa City Drug Enforcement UDEU) sa Lapu-Lapu City Police Office (LCPO) nga gihimo diha sa Sitio Sta. Lucia sa Barangay Punta Engaño sa miaging Biyernes sa gabii.

Si Police Lieutenant Colonel Christian Torres, tigpamaba sa LCPO miila  sa nadakpan nga mao ang 36  anyos nga lalaki nga giila lang sa iyang alyas nga Dado nga nagpuyo usab sa maong dapit.

Matud pa ni Torres nasakmit gikan sa suspek ang 25 gramo nga gituohang shabu nga nagkantidad og P170,000.

Sa laing operasyon, nasikop usab sa mga sakop sa City Intelligence Unit (CIU)  sa Mandaue City Police Office (MCPO) ang usa ka 46 anyos nga taxi driver sa buy bust operation nga ilang gipahigayon sa Sitio Bohol-Bohol  2, Barangay Looc, Siyudad sa Mandaue.

Ang suspetsado nga giila lamang sa pangalan nga Atek ug molopyo sa Barangay Cambaro sa maong dakbayan  ang nakuhaan kini og 50 gramo nga shabu nga nagkantidad og P340,000.00

Si  Police Lieutenant Colonel Mercy Villaro, tigpamaba  sa MCPO miingon nga nakadawat sila og impormasyon nga namaligya og shabu sa maong lugar ang suspek maong gilusad ang operasyon.

Ang mga dinakpan pasakaan og kasong kalapasan sa Section 5, Article II of RA 9165. (BANAT NEWS)