Sayo nga paghatag sa ayuda himoon sa siyudad sa Mandaue

CEBU, Philippines — Gitinguha karon sa kagamhanan sa siyudad sa Mandaue ang sayo nga pag-apod-apod sa pinansiyal nga ayuda sa mga solo parents, Person with Disabiity (PWD)'s ug mga senior citizen.

Matud pa ni Atty Jamaal James Calipayan Mandaue City Administrator nga gipahibalo na nila ang buhatan sa Commission on Election (Comelec) sa mao nilang tinguha.

Sa nasayran ang mga PWD's sa siyudad sa Mandaue makadawat na sa ilang P5,000 nga pinansiyal nga ayuda alang sa unang hugna nga pag-apod-apod nunot usab sa pag-usbaw na niini ngadto sa P10,000 gikan sa P8,000 nga ilang dawaton sa matag tuig.

Samtang ang mga senior citizen ang modawat usab og P5,000 alang sa unang hugna nga pagpanghatag sa ilang tinuig nga pinansiyal nga ayuda.

Ang gihugpong karon nga mga solo parents sa dakbayan ang magdawat usab og P10,000 nga tinuig nga ayuda ug bahinon gihapon ang paghatag niini ngadto sa duha ka hugna. Si Atty Calipayan miingon nga mahinungdanon kaayo nga masayo ang pagpanghatag sa pinansiyal nga ayuda sa mga senior citizen kay kon himoon kini nga liwas na ang election dugay na kaayo ug nasayod sila nga kinahanglan kaayo kini ilabi na nga mahal na kaayo karon ang tambal ug mga vitamins nga ilang gikinahanglan.

Dugang pa ni Calipayan nga ang Comelec mitugot usab kanila sa pagpanghatag og burial ug medical assistance alang sa mga kabus nga nanginahanglan.