Taripa sa bayranan sa tubig sa Moalboal gilatid na sa PWRA

CEBU, Philippines — Gilatid sa Cebu Provincial Water Resource Authority (PWRA) ang taripa alang sa paggamit og tubig sa mga residente ug establisamento sa lungsod sa Moalboal.

Si Gobernador Gwendolyn Garcia maoy nangulo sa pagpasabot sa mga residente sa siyam ka barangay sa Moalboal kalabot sa gilatid nga taripa sa bayranan sa tubig atol sa gipahigayon nga general assembly sa lungsod niadtong Enero 21.

Sumala sa Kapitolyo, dili momenus P115 matag bulan ang bayranan sa tubig alang sa mga residente nga makagamit og usa ngadto sa 10 metro kubiko nga tubig alang sa residential consumers. Ang bayranan mosaka depende sa gidaghanon sa tubig nga magamit.

Sa mga commercial establishment sama sa resorts, dili momenus P230 ang bayranan sa mogamit og usa ngadto sa 10 metro cubico nga tubig matag bulan.

“Gibuhat namo ang tanan pagtubag sa among tulomanon. Inyo sab tubagon ang inyong tulomanon kay aron ang dugay na ninyo gitinguha ug gidamgo, baynte-kwatro oras, pito ka adlaw sa usa ka semana, way hunong, way pahinay-hinay, naa na gyoy tubig matag panimalay,” matod ni Garcia sa mga residente sa barangay Saavedra, Tubli, Basdiot, Poblacion West, Poblacion East, Tunga, Lanao, Bugho, ug Bala.

Moabot sa sobra 8, 000 ka mga residente sa maong mga barangay ang mipadayag nga magpataod sa bulk water supply program sa Kapitolyo sumala ni Engr. Rey Marinas, ang hepe sa Provincial Waterworks Division.

Si Garcia kinsa maoy nangulo sa PWRA nagkanayon sa mga konsumidor sa tubig nga ang rate sa bayranan sa tubig nga gilatid sa Kapitolyo susama ra sab sa kasamtangang rate nga gipatuman sa Moalboal Water District (MWD).

Ang Kapitolyo magsugod na og kolekta sa binulan nga bayranan kon aprobado na sa Sangguniang Panlalawigan ang maong taripa sa bayranan sa tubig.

Ang lungsod sa Moalboal nalakip sa 25 ka mga LGUs nga kabahin sa bulk water supply system nga proyekto sa Probinsya sa Sugbo alang sa paghatag og tubig ngadto sa mga residente.

Ang Kapitolyo migasto na og P317 million alang sa maong proyekto sa tubig sa lungsod sa Moalboal diin ang tubig gikan sa spring sa barangay Bala nga kolektahon, limpyohan ug ipaagas ngadto sa konsumidor sa tubig.

Sumala sa Kapitolyo, ang maong spring sa maong barangay makahatag og six million ka litro sa tubig matag adlaw.