Tubag-Tubag nga sunog

CEBU, Philippines — Sa Marso pa ang opisyal nga panahon sa ting-init, apan nagtubag-tubag na ang mga insidente sa sunog dinhi sa Sugbu, partikular sa Mandaue City ug sa Lapu-Lapu City sugod niadtong Huwebes sa hapon hangtud kagabii, adlaw nga Biyernes.

Kagahapon sa hapon, niulbo ang sunog sa may Sangi Interior ug Seawage sa Barangay Pajo ug Seawage sa habig sab sa Pusok sa Dakbayan sa Lapu-Lapu nga gikatahong nagsugod gikan sa panimalay sa usa ka  Wilmer Ching sumala pa sa kabomberohan.

Naabot sa 5th alarm ang sunog ug napawong kini alas 4:14 na sa hapon. Walay gikataho nga nakalas o naangol sa maong pag-ulbo sa sunog.

Sumala pa sa inisyal nga report gikan sa Lapu-Lapu City BFP, 44 ka mga panimalay ang naapektahan diin 41 niini ang naugdaw ug tulo ang nakan-an sa kalayo.  Moabot sa 275 ka tawo o 59 ka pamilya ang apektado.

Ang Investigator na si FOI Vincent Rhey L Reyes uban sa ground commander F/Supt. Tito Purgatorio miingon nga naghimo pa sila imbestigasyon sa hinungdan sa maong sunog.

Si Mayor Junard Chan kinsa niadto sa lugar miingon nga tabangan sa siyudad ang mga naapektahan. Ang DSWS nipadala na og mga sakop aron tabangan ang mga nasunogan.

Gitubag kini og laing sunog sa Dakbayan sa Mandaue  diha managsikbit nga Sitio Waling-Waling sa Barangay Opao ug Sitio Pokang sa Barangay Looc.

Gisusi karon sa kabomberohan ang report nga nataligam-ang giluto maoy hinungdan sa pag-ulbo sa maong sunog. Ang sunog nahimutang sa sudlonon nga bahin sa maong dapit.  Matud pa ni Kapitan Raul Kevin Cabahug sa Barangay Looc, daghan ang mga nagpuyo sa nasunog nga lugar.

Bana-bana niya dili mominos 100 ngadto sa 200 ka panimalay ang naa didto  apan gisubay pa hangtud ning pagsulat sa balita kun pila gyud ang naapektahan.

Tungod kay sudlonon ang lugar, gisumpay-sumpay sa kabomberohan ang ilang mga hose aron makaabot sa nasunog nga dapit.

Apan wala pa gani hingpit makahuman ang kabomberohan sa Mandaue sa ilang operasyon sa Looc ug Opao, laing alarma na sab ang sunog ang niulbo sa Barangay Tabok nga matud pa naglambigit gihapon og mga kabalayan pasado alas-8 na sa gabii. Hinuon dali ra kining napawong.

Niadtong Huwebes sa hapon, miulbo sa may Hernan Cortes Street, Barangay Banilad Dakbayan sa Mandaue.

Ang alarma nadawat ala 1:58 ug hingpit nga na fire out alas 3:04 na sa hapon. Ang maong sunog naglambigit og usa ka unit nga two story warehouse type building nga naay showroom nga giingong iya ni Osbert Ong.

Walay gikataho nga nakalas o naangol sa maong sunog sa maong gitawag og The Furniture City, apan P10 milyones ang danyo niini. Giingong nagsugod sa ikaduha nga andana sa stockroom sa dihang nisilaob ang usa sa ilang aircondition unit.--  IBM BANAT NEWS