Walo ka tawo nadakpan sa drug bust
CEBU, Philippines — Dul-an sa usa ka milyon ka pesos ang balor sa illegal nga drugas nga nasakmit sa buy-bust operation sa PNP Drug Enforcement Group (PNP-DEG) sa managlahi nga Barangay sa siyudad sa Sugbo niadtong Huwebes sa gabiI ug Biyernes sa kadlawon.
Ang buy-bust operation gihimo diha sa Saint Jude Street, Sitio Camansi, Barangay Mabolo nga niresulta sa pagkasikop kang Kevin Villasin Manigos alyas Bentoy, 36, taga Caballes Compound, Barangay Guadalupe ning siyudad.
Nakuhaan ang ang suspetsado og 56 gramos nga shabu nga nibalor og P380,800 ug usa ka motorsiklo.
Sunod nga operasyon nahitabo Biyernes sa kadlawon, Enero 24, 2025 diha sa Taboan Public Market, Barangay San Nicolas Proper, Cebu City ug nadakpan si
Ariel Sumaylo alyas Aye, 29, taga Sitio Plaza, Barangay Apas nga nakuhaan og 62 gramos nga shabu nga nagkantidad og P426,600.
Sa pikas bahin, tulo ka tawo ang nadakpan diha sa drug den atol sa buy-bust operation sa PDEA Cebu Provincial Office ug Dalaguete Municipal Police Station sa Barangay Caleriohan, Lungsod sa Dalaguete kagahapon sa alas 2 sa kadlawon, Biyernes, Enero 24, 2025.
Nadakpan ang nagpadagan sa maong drug den nga si alyas Angelo,33, ug ang target sa operasyon nga si alyas Juanito, 53, ug alalay niini nga babaye nga si 39- anyos, taga Barangay Jolomaynon, Dalaguete.
Katorse ka putos sa gituohang shabu nga nitimbang og 51 gramos ug nagkantidad og P346, 800, buy-bust money, kwarta nga P648 nga gituohang halin sa illegal nga drugas ug nagkalain-laing drug paraphernalia ang nasakmit gikan kanila.
Samtang didto sa Bohol, nadakpan ang magtiayon nga giingong nag-operate og drug den atol sa buy-bust operation sa mga operatiba sa PDEA Bohol Provincial Office, Tagbilaran City Police Station ug PNP Bohol Maritime Police diha sa Barangay Cogon, Tagbilaran City niadtong Huwebes sa udto, Huwebes, Enero 23, 2025.
Ang mga nadakpan mao sila si alyas Roel, 45 , ug asawa niini nga si alyas Marjorie, 48, nagpuyo sa naasoy nga barangay. Nadakpan sab ang usa ka alyas Edmon, 44, nga naatlan sa drug den.
Nasakmit sa maong operasyon ang 11 ka putos sa gituohang shabu nga nitimbang og 12 gramos ug nagkantidad og P81, 600, buy-bust money, kwarta nga P250 nga gituohang halin sa illegal drug transaction, duha ka cellphones ug nagkalain-laing drug paraphernalia.
Kasong kalapasan sa Sections 5, 6, 7, 11, ug 12, Article II sa Republic Act 9165 ang ipasaka batok sa mga suspetsado.-- Romeo D. Marantal IBM BANAT NEWS
- Latest
