Head guard gipusil patay

CEBU, Philippines — Patay ang usa ka head internal security officer human kini gipusil sa riding-in-tandem samtang naglakaw padung sa gi-park niya nga motorsiklo sa Barangay San Isidro, Lungsod sa San Fernando, Huwebes sa gabii, Enero 23, 2025.

Ang biktima mao Armando Panton Cañedo, 32, nagpuyo sa Barangay Valencia, Dakbayan sa Carcar.

Sa imbestigasyon sa San Fernando Municipal Police Station nga ang biktima nigawas sa gitrabahoang kompaniya ug nilakaw padulong sa dapit asa gi-park ang iyang motorsiklo.

Samtang naglingkod pa kini sa iyang motorsiklo duha ka mga lalake ang niabot ug ang usa nidagan padulong sa biktima ug diretso kining gipusil sa makadaghang higayon nga nakaingon sa iyang kamatayon.  Ang mga mamumuno dali nga nanakay og motorsiklo ug nisibat palayo.

Na-recover sa kapulisan ang upat ka basiyo ug usa ka deformed slug gikan sa wala matinong kalibre sa armas diha sa crime scene. Gisubay karon sa kapulisan nga may kalambigitan sa trabaho ug personal grudge ang motibo sa maong pagpamusil.-- IBM  BANAT NEWS