Mga bata sa 4Ps beneficiaries iparehistro sa PhilSys
CEBU, Philippines — Makaangkon og duha ka buwan nga Family Development Session (FDS) compliance ang household beneficiaries sa 4P's kon ilang iparehistro sa Philippine Identification System (PhilSys) o national ID ang miyembro sa ilang pamilya lakip na ang mga bata nga nag-edad og 0 ngadto sa 5-anyos.
Matud ni 4Ps National Program Manager and Director Gemma Gabuya nga ang PhilSys registration ug authentication magsilbi nga sama sa compliance sa binuwan nga FDS alang sa mga bulan sa Pebrero hangtud sa Marso.
Gihimo kini nga pamaagi sa Department of Social Welfare and Development (DSWD) aron madugangan ang gidaghanon sa mga bata nga ubos sa 5-anyos nga adunay access sa mga benepisyo sa pagbaton og PhilSys-issued national identification (ID) card.
Giawhag sa DSWD ang tanang beneficiaries nga adunay mga miyembro sa pamilya nga nag-edad og 0 ngadto sa 5-anyos nga iparehistro kini sa PhilSys.
Mahimong magparehistro sa mga designated registration center sama sa barangay hall, mall, ug FDS co-location venues, special sites nga giorganisa sa PSA lakip ang bag-ong mga registration center nga ablihan sa mga tunghaan ug daycare centers aron mapadali ang pagrehistro sa mga bata.
Samtang ang ni-avail sa FDS equivalency kinahanglang mopresentar sa ilang transaction reference number (TRN) o PhilSys card number (PCN) ug ipa-authenticate ang ilang registration atol sa Period One (P1 2025) nga naglangkub sa bulan sa Pebrero hangtud sa Marso sa compliance monitoring timeline.
Tumong niini nga matuman nila ang mga kinahanglanon sa programa alang sa cash grants ug mapahapsay ang proseso sa sayong edad.
Paglakip sa mga bata sa PhilSys registration subay kini sa direktiba ni DSWD Secretary Rex Gatchalian nga palapdan ang national ID system sa 4Ps households isip kabahin sa pagpahapsay sa mga serbisyo sa gobiyerno. BDB BANAT NEWS
- Latest
