Hubo Mass gihugopan sa mga magtutuo

CEBU, Philippines — Natapos na ang kasaulogan sa ika-460th Fiesta Celebration sa Señor Santo Niño diin kagahapon gipahigayon ang Hubo Mass ug ang pag-ilis og sinina ni Santo Niño.

Gidagsa gihapon sa bagang duot sa mga magtutuo ang Hubo Mass diha sa Basilica Minore del Santo Niño de Cebu kagahapon sa kadlawon.  Gisaksihan sa mga magtutuo ang seremoniyas sa paghubo sa sinina ni Santo Niño diin gitagsa-tagsa pagtang-tang gikan sa korona, setro, globo nga anaa sa iyang kamot hangtud na sa iyang kapa apil ang tanang sinina sa lawas niini.

Ang imahen kay gituslob sa tubig, giputos sa gagmay nga panapton dayon gisul-oban sa bag-ong sinina ug susama sa paghubo ang pagsul-ob sa iyang bag-ong sinina.

Ang Hubo Mass nagsilbi nga culmination sa relihiyosong kalihokan sa Fiesta Señor nga himuon usa ka semana gikan sa pag-abli sa nobenaryo ni Santo Niño.

Ang pag-ilis sa sinina ni Santo Niño nagpakita kini sa pagkamasunoron ug pagkamapahiubsanon diin nagsimbolo usab sa kausaban sa mga magtutuo nga gikan sa karaan nga pagkatawo ngadto na sa pagbag-o sa kinabuhi diin sentro na si Hesus matud sa kadagkoan sa Basilica.

Sa laing bahin, si Senador Imee Marcos, kinsa nibisita sa Sugbo nibutyag nga niapil siya sa kalihokan sa Hubo ug matag tuig anaa siya sa maong kalihokan.

Gibutyag ni Marcos nga kanunay niya’ng giampo ang iyang inahan nga si kanhi first lady Imelda Marcos kinsa usa usab ka deboto ni Santo Niño ug magpangedaron na kini og 96-anyos karong tuiga.

Lakip usab niya’ng giampo nga maayo ang taho sa ekonomiya bisan taliwala sa kalisud ug nagtaas ang palaliton malaomon siya nga adunay milagro ang Santo Niño ug buligan kitang tanan. BDB BANAT NEWS