Lalaki naglingkod gitigbas sa walay igong rason

CEBU, Philippines — Nabalhog sa prisohan ang usa ka 40-anyos nga lalaki human kini nanigbas sa walay igong rason diha sa Sitio Lokana, Barangay Kalunasan, Dakbayan sa Sugbo niadtong Huwebes sa kadlawon, Enero 23, 2025.

Ang biktima mao si alyas “Rod”, 45-anyos, nagpuyo sa Upper Kalunasan, Barangay Kalunasan niining siyudad samtang ang suspect mao alyas “Ric”, 40-anyos, lumulupyo sa Lower Kamparang sa nahisgutang barangay  .

Base sa taho sa Guadalupe Police Station sa Cebu City Police Office (CCPO) nakadawat sila og tawag gikan sa BPSO Barangay Kalunasan kalabot sa nahitabong pagpanigbas sa naasoy nga dapit.

Dali kining girespondehan sa kapolisan ug nasikop ang suspetsado ug na-recover ang sundang nga gigamit niini sa pagpanigbas.

Base usab sa imbestigasyon sa kapolisan nga ang biktima kuyog ang laing duha ka kauban niini naglingkod sa dapit ug kalit nga niabot ang suspetsado nga nagdala og sundang ug sa walay igong rasong gitigbas ang biktima ug nakaangnkon kini og samad tinigbasan sa nawong ug wala nga mga tudlo. Ang biktima daling gidala diha sa Cebu City Medical Center.

Ang suspetsado natingkagol karon sa detention cell sa Guadalupe Police Station ug gikatakdang pasakaan og kasong frustrated murder. BDB BANAT NEWS